ممبئی (شوبز ڈیسک) — بھارت کے معروف مزاحیہ اداکار ستی ش شاہ 74 سال کی عمر میں انتقال کر گئے۔ اہلِ خانہ کے مطابق وہ گردوں کے عارضے میں مبتلا تھے اور گزشتہ چند دنوں سے ممبئی کے ہندوجا اسپتال میں زیرِ علاج تھے، جہاں جمعے کے روز ان کا انتقال ہوگیا۔
ستی ش شاہ 1951 میں ممبئی میں پیدا ہوئے اور بھارت کے کامیڈی سینما کی پہچان بن گئے۔ ان کا کیریئر چار دہائیوں سے زائد پر محیط رہا، جس میں انہوں نے 250 سے زیادہ فلموں اور درجنوں ٹی وی شوز میں کام کیا۔
انہوں نے 1983 کی مشہور فلم "جانے بھی دو یارو” میں کمشنر ڈِمیلو کا کردار نبھا کر شائقین کے دل جیت لیے۔ ٹیلی ویژن پر ان کا کردار اندراودن ساربھائی سیٹ کام "ساربھائی ورسس ساربھائی” میں بے حد مقبول ہوا اور بھارتی گھروں میں ان کا نام ہمیشہ کے لیے یادگار بن گیا۔
ستی ش شاہ نے کل ہو نا ہو، مجھ سے شادی کروگی اور میں ہوں نا جیسی کامیاب فلموں میں اپنی مزاحیہ اداکاری سے ناظرین کو خوب محظوظ کیا۔
ان کے انتقال پر فلمی برادری اور مداحوں کی جانب سے گہرے دکھ کا اظہار کیا جا رہا ہے۔ اداکاروں نے انہیں “ہنسی کی دنیا کا حقیقی لیجنڈ” قرار دیا ہے۔
ستی ش شاہ کی خدمات بھارتی تفریحی دنیا کے لیے ناقابلِ فراموش ہیں۔ ان کی ہنسی، ان کا انداز اور ان کی یادیں ہمیشہ مداحوں کے دلوں میں زندہ رہیں گی۔
