اسلام آباد (15 ستمبر 2025) — ملالہ یوسفزئی اور ضیاء الدین یوسفزئی نے پاکستان کے ان علاقوں میں، جو حالیہ سیلاب سے متاثر ہوئے ہیں، تعلیمی سرگرمیوں کی بحالی کے لیے 2 لاکھ 30 ہزار امریکی ڈالر کی ہنگامی گرانٹ کا اعلان کیا ہے۔
ملالہ فنڈ کی جانب سے جاری کردہ پریس ریلیز میں کہا گیا ہے کہ یہ مالی معاونت مقامی اداروں، ادارہ تعلیم و آگہی (ITA) اور ماؤنٹین انسٹیٹیوٹ آف ایجوکیشن اینڈ ڈویلپمنٹ (MIED) کو دی جائے گی تاکہ متاثرہ کمیونٹیز میں دوبارہ تعلیمی رابطہ قائم کرنے میں مدد مل سکے۔
اس گرانٹ کے ذریعے طلبہ کو کتابیں، یونیفارم، اسکول بیگز اور حفظانِ صحت کے کٹس فراہم کیے جائیں گے جبکہ عارضی تعلیمی مراکز بھی قائم کیے جائیں گے۔ رپورٹ کے مطابق حالیہ سیلاب میں درجنوں اسکول تباہ ہوئے جس کے نتیجے میں ہزاروں بچے تعلیم سے محروم ہو گئے۔
اپنے بیان میں ملالہ یوسفزئی نے کہا: "تعلیم تمام بچوں کا بنیادی حق ہے اور ہم اسے آفت کے ہاتھوں چھیننے نہیں دے سکتے۔”
گزشتہ سال پاکستان کے مختلف حصوں، خاص طور پر سوات، شانگلہ اور دیگر پہاڑی علاقوں میں آنے والے تباہ کن سیلاب نے درجنوں تعلیمی اداروں کو شدید نقصان پہنچایا۔ ماہرین نے خبردار کیا ہے کہ اگر فوری اقدامات نہ کیے گئے تو یہ تعلیمی خسارہ کئی دہائیوں تک برقرار رہ سکتا ہے۔
