آرکٹک ہوائیں امریکہ کے بیشتر حصوں پر چھا گئیں، بعض علاقوں میں برفباری اور فلوریڈا میں شدید سردی
امریکہ میں موسم سرما کی شدت بڑھ گئی ہے، جہاں آرکٹک ہواؤں نے ملک کے مشرقی دو تہائی حصے کو اپنی لپیٹ میں لے لیا ہے، جس کے باعث درجہ حرارت میں نمایاں کمی اور کئی علاقوں میں برفباری شروع ہوگئی ہے۔
نیشنل ویدر سروس (NWS) کے مطابق یہ سرد ہوائیں رواں خزاں کا سب سے طاقتور نظام ہیں، جو کروڑوں امریکیوں کو متاثر کر رہی ہیں۔ محکمہ موسمیات نے خبردار کیا ہے کہ جنوب مشرقی امریکہ میں ریکارڈ سطح کی ٹھنڈ پڑ سکتی ہے، خاص طور پر فلوریڈا میں جہاں ایک دن پہلے تک درجہ حرارت 27 ڈگری سینٹی گریڈ کے قریب تھا۔
علاقے کے کئی حصوں میں تیز ہوائیں اور ریڈ فلیگ وارننگز جاری کی گئی ہیں، خاص طور پر گریٹ پلینز میں۔ دوسری جانب، گریٹ لیکس اور اپالیچین پہاڑی سلسلے میں 10 سے 20 سینٹی میٹر تک برفباری کی پیش گوئی کی گئی ہے۔
لیک ایری کے آس پاس کے علاقوں میں موسمیاتی ماہرین نے لیک ایفیکٹ اسنو کی وارننگ دی ہے، جس میں تیز برفباری محدود علاقوں میں ہوتی ہے اور قریبی مقامات پر اثرات کم رہتے ہیں۔
اسی دوران اوہائیو، ویسٹ ورجینیا، اور کینٹکی میں سردی کی ایڈوائزری جاری کی گئی ہے، جبکہ ٹیکساس، اوکلاہوما، الاباما اور جارجیا جیسے جنوبی ریاستوں میں بھی درجہ حرارت منجمد سطح تک گرنے کا امکان ظاہر کیا گیا ہے۔
