راولپنڈی : جوائنٹ چیفس آف اسٹاف کمیٹی کے سبکدوش ہونے والے چیئرمین جنرل ساحر شمشاد مرزا نے مسلح افواج پر زور دیا ہے کہ بدلتی ہوئی سکیورٹی صورتحال سے نمٹنے کے لیے مربوط اور متحد حکمتِ عملی اپنائی جائے۔
جوائنٹ اسٹاف ہیڈکوارٹرز میں الوداعی خطاب کرتے ہوئے جنرل ساحر نے کہا کہ دنیا غیر معمولی رفتار سے بدل رہی ہے اور یہ تبدیلیاں پاکستان کے داخلی و خارجی سلامتی چیلنجز پر گہرے اثرات ڈال رہی ہیں۔ ان کے مطابق موجودہ خطرات ہائبرڈ وارفیئر سے لے کر روایتی جنگ تک پھیلے ہوئے ہیں، جن سے نمٹنے کیلئے افواج کے درمیان مضبوط ہم آہنگی اور واضح مشترکہ مقصد ضروری ہے۔
انہوں نے کہا کہ مستقبل کی جنگی ضروریات کے پیش نظر مربوط منصوبہ بندی اب اختیار نہیں بلکہ ادارہ جاتی ضرورت بن چکی ہے۔ مسلح افواج کو ایک مضبوط، بااختیار اور دوراندیش نظام کے ساتھ اپنی تیاریوں کو مزید مؤثر بنانا ہوگا تاکہ بدلتے خطرات کا بروقت جواب دیا جاسکے۔
جنرل مرزا نے آخر میں افواج، خصوصاً جوائنٹ اسٹاف ہیڈکوارٹرز کے لیے نیک تمناؤں کا اظہار کیا اور انہیں ہدایت کی کہ نئی ذمہ داریوں کے ساتھ دیانت داری اور عزم کے ساتھ اپنے فرائض انجام دیں۔
