پاکستان سپر لیگ (پی ایس ایل) میں دو نئی ٹیموں کی شمولیت کے لیے 12 مختلف پارٹیوں نے دلچسپی کا اظہار کرتے ہوئے بڈز جمع کرائی ہیں۔
پاکستان کرکٹ بورڈ (پی سی بی) کے مطابق دنیا بھر کی متعدد کمپنیوں نے پی ایس ایل کی فرنچائز خریدنے میں دلچسپی ظاہر کی ہے۔
پی سی بی کے اعلامیے میں کہا گیا ہے کہ پانچ براعظموں سے بڈز موصول ہوئی ہیں، جن میں امریکی بزنس مینوں کا کنسورشیم، ٹیلی کام سیکٹر کی کمپنی، رئیل اسٹیٹ گروپ اور سولر ٹیکنالوجی کا ادارہ بھی شامل ہے۔
اعلامیہ مزید بتاتا ہے کہ دو نئی ٹیموں کی نیلامی کے لیے موصول ہونے والی یہ بولیاں غیر معمولی اور حوصلہ افزا ہیں۔
بیان میں کہا گیا ہے کہ پانچ براعظموں سے دلچسپی کا اظہار ہونا پی ایس ایل کی بین الاقوامی مقبولیت اور مضبوط برانڈ ویلیو کا واضح ثبوت ہے۔ بڈنگ کے پہلے مرحلے کے نتائج 27 دسمبر کو ظاہر کیے جائیں گے۔
پی سی بی کا کہنا ہے کہ 8 جنوری کو ہونے والے اگلے مرحلے میں ٹیکنیکی طور پر اہل بولی دہندگان کو اوپن کمپیٹیشن کے ذریعے دو نئی ٹیمیں خریدنے کا موقع دیا جائے گا۔
پی سی بی کے مطابق پورا عمل مکمل شفافیت اور عالمی معیار کے مطابق انجام دیا جائے گا تاکہ لیگ کی مزید توسیع اور ترقی کو یقینی بنایا جا سکے۔
