جے ایس بینک کے ڈیجیٹل بینکنگ پلیٹ فارم زندگی نے بیرونِ ملک مقیم پاکستانیوں کے لیے ’’زندگی اوورسیز اکاؤنٹس‘‘ متعارف کرا دیے ہیں، جس کے ذریعے اہل پاکستانی بغیر پاکستانی موبائل نمبر یا بینک برانچ جائے، ڈیجیٹل طور پر پاکستان میں بینک اکاؤنٹ کھول اور چلا سکیں گے۔
صارفین اپنے بین الاقوامی واٹس ایپ نمبرز کے ذریعے رجسٹریشن کرا کے آئی بی اے این (IBAN) کا حامل باقاعدہ بینک اکاؤنٹ کھول سکیں گے۔ زندگی ایپ کے ذریعے وہ اہلِ خانہ کی مالی معاونت، یوٹیلیٹی بلز کی ادائیگی، پاکستان میں رقوم کی منتقلی اور دیگر بینکاری معاملات بھی انجام دے سکیں گے۔
یہ سہولت پاکستان اوریجن کارڈ (POC)، نائیکوپ (NICOP) یا کمپیوٹرائزڈ قومی شناختی کارڈ (CNIC) رکھنے والے اہل پاکستانیوں کے لیے دستیاب ہے۔
متعلقہ ضوابط کے تحت صارفین نان ریزیڈنٹ اکاؤنٹ ریپیٹری ایبل (NRAR) یا نان ریزیڈنٹ اکاؤنٹ نان ریپیٹری ایبل (NRNAR) میں سے کسی ایک کا انتخاب کر سکتے ہیں۔
زندگی کے شریک بانی اور چیف آفیسر نعمان اظہر نے کہا کہ اوورسیز اکاؤنٹس کا اجرا ہر پاکستانی کے لیے بینکاری کو آسان اور قابلِ رسائی بنانے کے ادارے کے وژن کا حصہ ہے۔
ان کے مطابق جغرافیائی سرحدیں مالی خدمات تک رسائی میں رکاوٹ نہیں بننی چاہئیں۔ انہوں نے کہا کہ یہ سہولت بیرونِ ملک مقیم پاکستانیوں کو اپنے وطن سے مالی طور پر منسلک رکھنے میں مدد دے گی۔
