انقرہ: ترک صدر رجب طیب اردوان نے ایک مرتبہ پھر برادر ملک پاکستان کے ساتھ اپنی غیر متزلزل حمایت کا اعادہ کیا ہے اور کہا ہے کہ ترکیہ اچھے برے دنوں میں پاکستانی قوم کے شانہ بشانہ کھڑا رہے گا۔
ترک کابینہ کے اجلاس سے خطاب کرتے ہوئے صدر اردوان نے پاکستان اور بھارت کے درمیان حالیہ جنگ بندی پر اطمینان کا اظہار کیا اور بتایا کہ پہلگام واقعے کے بعد پیدا ہونے والی کشیدگی کو کم کرنے کے لیے ترکیہ نے مسلسل سفارتی کوششیں کیں۔
انہوں نے کہا کہ "دونوں ممالک کے درمیان حالات اس نہج پر پہنچ گئے تھے کہ خطے کا امن خطرے میں پڑ گیا تھا۔” صدر اردوان نے مزید بتایا کہ انہوں نے وزیر اعظم شہباز شریف سے ٹیلی فونک رابطہ کیا جس میں خطے کی صورتحال پر اہم گفتگو ہوئی اور اس کے مثبت نتائج بھی دیکھنے کو ملے۔
اس موقع پر صدر اردوان نے پاکستانی عوام کو ان کے صبر، حوصلے اور دانشمندی پر مبارکباد پیش کی اور کہا کہ ان کے رویے نے حالات کو مزید بگڑنے سے بچا لیا۔
انہوں نے دونوں ممالک کو مشورہ دیا کہ اشتعال انگیزی سے اجتناب کریں اور امن و مکالمے کے ذریعے مسائل کے حل کی جانب بڑھیں۔ ان کا کہنا تھا کہ جنگ بندی کے نتیجے میں پیدا ہونے والا سکون کا ماحول پانی سمیت دیگر دیرینہ مسائل کے حل میں مددگار ثابت ہوسکتا ہے۔
صدر اردوان نے آخر میں یقین دلایا کہ ترکیہ، ان شاء اللہ، ہر مشکل وقت میں پاکستانی قوم کے ساتھ کھڑا رہے گا۔
