پاکستان کی تاریخ میں پہلی بار پنجاب حکومت نے لڑکیوں کو سروائیکل کینسر سے بچانے کے لیے ایک بڑی طبی مہم شروع کرنے کا فیصلہ کیا ہے۔
پنجاب کے وزیر صحت خواجہ عمران نذیر اور وزیر تعلیم رانا سکندر حیات کی زیرِ صدارت اجلاس میں یہ اہم فیصلہ کیا گیا کہ یہ مہم نومبر میں شروع کی جائے گی۔
سما ٹی وی کے مطابق، اس مہم کا ہدف ہے کہ پنجاب بھر میں 9 سے 14 سال کی عمر کی 80 لاکھ بچیوں کو ویکسین دی جائے تاکہ مستقبل میں انہیں اس خطرناک مرض سے محفوظ رکھا جا سکے۔
یہ مہم صرف سرکاری اسکولوں تک محدود نہیں ہوگی، بلکہ نجی اسکولوں اور مدارس کی طالبات کو بھی شامل کیا جائے گا۔ محکمہ صحت کی ٹیمیں خود اسکولوں میں جا کر بچیوں کو ویکسین فراہم کریں گی۔
مہم کو کامیاب اور مؤثر بنانے کے لیے ایک خصوصی ورکنگ گروپ بھی تشکیل دیا جائے گا جو پوری مہم کی نگرانی اور انتظامات کو یقینی بنائے گا۔
