مداحوں کے لیے خوشی کی خبر ہے کہ ساؤتھ انڈین فلم انڈسٹری کے مقبول اداکار رشمی کا مندنّا اور وجے دیوراکونڈا نے باضابطہ طور پر منگنی کر لی ہے۔ برسوں سے جاری ان کے رشتے کی قیاس آرائیوں کے بعد، وجے دیوراکونڈا کی ٹیم نے ہفتے کی صبح ہندوستان ٹائمز کو منگنی کی تصدیق کرتے ہوئے تمام افواہوں کو ختم کر دیا۔
تصدیق کے مطابق، یہ مشہور جوڑا فروری 2026 میں شادی کے بندھن میں بندھنے جا رہا ہے۔ تاہم منگنی کی تقریب کی تفصیلات ابھی تک منظرِ عام پر نہیں آئیں، اور نہ ہی رشمی کا یا وجے نے اپنے سوشل میڈیا اکاؤنٹس پر کوئی باضابطہ اعلان کیا ہے۔
رشمی کا اور وجے کے درمیان قریبی تعلق اُس وقت پروان چڑھا جب دونوں نے ایک ساتھ بلاک بسٹر فلموں "گیتا گووندم” (2018) اور "ڈیئر کامریڈ” (2019) میں کام کیا۔ ان کی شاندار آن اسکرین کیمسٹری نے جلد ہی آف اسکرین رشتے کی افواہوں کو جنم دیا، جنہیں مداحوں نے بڑی دلچسپی سے فالو کیا۔
گزشتہ برسوں میں، رشمی کا اور وجے کو متعدد مواقع پر ایک ساتھ دیکھا گیا چاہے وہ 43ویں انڈیا ڈے پریڈ نیویارک ہو یا بھارت بیونڈ بارڈرز جیسا ایونٹ یہاں تک کہ دونوں نے اپنی چھٹیوں کی تصویریں بھی ایک جیسے مقامات سے پوسٹ کیں، جس سے ان کے تعلقات کی چہ مگوئیاں مزید مضبوط ہو گئیں۔
سال 2024 میں دونوں اداکاروں نے انٹرویوز میں اشارہ دیا تھا کہ وہ "سنگل نہیں” ہیں، مگر اپنے ساتھی کا نام ظاہر نہیں کیا۔ حال ہی میں انہیں ایک ساتھ ایئرپورٹ سے نکلتے ہوئے ایک ہی گاڑی میں دیکھا گیا، جس سے مداحوں کے خدشات کو مزید تقویت ملی کہ وہ اب اپنے رشتے کو باضابطہ شکل دینے جا رہے ہیں۔
پیشہ ورانہ لحاظ سے، رشمی کا مندنّا کو آخری بار فلم کبیرا میں دیکھا گیا، جس میں دھنش اور ناگرجنا نے بھی مرکزی کردار ادا کیا۔ ان کی آنے والی فلم "تھمّا” ایک ہارر کامیڈی ہے جس میں آیوشمان کھرانہ، نوازالدین صدیقی اور پاریش راول بھی شامل ہیں، جو دیوالی 2025 پر ریلیز ہوگی۔ وہ "کاک ٹیل 2” میں کریتی سینن اور شاہد کپور کے ساتھ بھی نظر آئیں گی، جبکہ ان کے دیگر منصوبوں میں دی گرل فرینڈ اور میسا شامل ہیں۔
دوسری جانب، وجے دیوراکونڈا حال ہی میں فلم کنگڈم میں جلوہ گر ہوئے، جس کی ہدایت کاری گوتم تننوری نے کی، اور یہ فلم ستھارا انٹرٹینمنٹس اور فورچون فور سنیماس کے بینر تلے بنائی گئی، جس میں ستیا دیو اور بھاگیہ شری بورسے نے بھی اداکاری کی۔
اب جبکہ دونوں کی منگنی کی تصدیق ہو چکی ہے، تو رشمی کا مندنّا اور وجے دیوراکونڈا کی شادی، جو فروری 2026 میں متوقع ہے، بھارتی فلم انڈسٹری کے سب سے زیادہ زیرِ بحث اور یادگار تقاریب میں سے ایک بننے جا رہی ہے۔
