پنجاب ہیلتھ کیئر کمیشن نے ہسپتالوں کی گریڈنگ کے لیے نیا مینوئل تیار کر لیا، جس کے عملی نفاذ سے قبل پائلٹ ٹیسٹنگ کا آغاز کرنے کا فیصلہ کیا گیا ہے۔ اس مقصد کے لیے ماہرین صحت سے تجاویز طلب کر لی گئی ہیں تاکہ نظام کو مزید مؤثر اور قابلِ عمل بنایا جا سکے۔
یہ فیصلہ پنجاب ہیلتھ کیئر کمیشن کے چیف ایگزیکٹو آفیسر ڈاکٹر ثاقب عزیز کی زیرِ صدارت ہونے والے اجلاس میں کیا گیا، جس میں سرکاری اور نجی بڑے ہسپتالوں کی سینئر مینجمنٹ نے شرکت کی۔
ذرائع کے مطابق اجلاس میں فاطمہ جناح میڈیکل یونیورسٹی کی وائس چانسلر نے آن لائن شرکت کی، جبکہ راولپنڈی، فیصل آباد اور ملتان کے مختلف ہسپتالوں کے سربراہان بھی ویڈیو لنک کے ذریعے اجلاس میں شریک ہوئے۔
اجلاس کے دوران پنجاب ہیلتھ کیئر کمیشن کے ڈائریکٹر ڈاکٹر مشتاق احمد نے ہسپتالوں کی گریڈنگ کے لیے تیار کیے گئے مینوئل اور اس کے مختلف پہلوؤں پر تفصیلی بریفنگ دی۔ شرکاء کو آگاہ کیا گیا کہ مینوئل کے باضابطہ اجرا سے قبل اسے آزمائشی بنیادوں پر نافذ کیا جائے گا تاکہ حاصل ہونے والی تجاویز اور تجربات کی روشنی میں ضروری بہتری لائی جا سکے۔
ڈاکٹر ثاقب عزیز نے کہا کہ ہسپتالوں کی گریڈنگ کا فریم ورک بین الاقوامی تجربات اور معیارات کو مدنظر رکھتے ہوئے تیار کیا گیا ہے۔
ان کے مطابق اس نظام کے ذریعے مریضوں کو مختلف علاجگاہوں کے معیار سے متعلق مستند معلومات دستیاب ہوں گی، جس سے وہ بہتر اور باخبر فیصلہ کرتے ہوئے مناسب ہسپتال کا انتخاب کر سکیں گے۔
