کراچی: اداکار میکال ذوالفقار نے کہا ہے کہ وہ دوبارہ بھارت میں کام کرنے کے لیے تیار ہیں، تاہم اس کے لیے ضروری ہے کہ انہیں باعزت انداز میں مدعو کیا جائے، برابر کا سلوک کیا جائے اور ان کی صلاحیتوں کا غلط استعمال نہ ہو۔
ایک حالیہ انٹرویو میں بالی ووڈ میں واپسی کے امکان کے بارے میں بات کرتے ہوئے میکال ذوالفقار نے کہا کہ اگر حالات سازگار ہوں تو وہ بھارت میں اچھے مواقع پر غور کرسکتے ہیں۔ تاہم انہوں نے واضح کیا کہ وہ بھارت میں کام کے خواہش مند یا اس کے محتاج نہیں اور پاکستان میں اپنے کیریئر سے مطمئن ہیں۔
انہوں نے کہا کہ وہ بھارت واپس جانے کے خیال کے لیے کھلے ہیں، بشرطیکہ انہیں عزت کے ساتھ بلایا جائے اور برابری کی بنیاد پر مواقع فراہم کیے جائیں۔
پاکستان اور بھارت کے درمیان فنکارانہ تعاون پر عائد پابندیوں کے حوالے سے میکال ذوالفقار نے مایوسی کا اظہار کرتے ہوئے موجودہ صورتحال کو "بچکانہ اور مضحکہ خیز” قرار دیا۔
ان کے مطابق دونوں ممالک کے تعلقات میں سیاست اکثر دیگر تمام معاملات پر حاوی ہوجاتی ہے۔ انہوں نے کہا کہ اداکاروں کو سیاسی اختلافات کا حصہ بننے کے بجائے لوگوں کو قریب لانے میں کردار ادا کرنا چاہیے۔
میکال ذوالفقار کا بھارتی فلمی سفر ان کے ماڈلنگ کے دور سے شروع ہوا۔ 2006 میں وہ پاکستان اور بھارت کی مشترکہ فلم ’گاڈ فادر‘ میں نظر آئے، جس کی شوٹنگ دبئی اور بلغاریہ میں ہوئی تھی۔ اس فلم میں انہوں نے بھارتی اداکار ونود کھنہ اور ارباز خان کے ساتھ کام کیا۔
بعد ازاں 2007 کی فلم ’شوٹ آن سائٹ‘ میں انہوں نے نصیرالدین شاہ اور مرحوم اوم پوری کے ساتھ اداکاری کی۔ میکال نے اس تجربے کو اپنے کیریئر کا ایک اہم مرحلہ قرار دیتے ہوئے کہا کہ دونوں سینئر اداکاروں کی پیشہ ورانہ نظم و ضبط سے انہیں بہت کچھ سیکھنے کا موقع ملا۔
انہوں نے ایک واقعہ یاد کرتے ہوئے بتایا کہ وہ ایک صبح شوٹنگ پر تاخیر سے پہنچے تو نصیرالدین شاہ پہلے ہی مکمل تیاری کے ساتھ وہاں موجود تھے اور اخبار پڑھ رہے تھے۔ میکال کے مطابق اس واقعے نے ایک تجربہ کار اداکار کے نظم و ضبط کو واضح کیا۔
میکال نے یہ بھی کہا کہ سیاسی اور ثقافتی اختلافات کے باوجود انہیں بھارتی ساتھی فنکار انتہائی دوستانہ لگے۔ ان کے مطابق دونوں ممالک کے عام لوگوں میں بہت سی مشترک باتیں ہیں۔
اپنی ذاتی زندگی کے حوالے سے اداکار نے بتایا کہ وہ عام طور پر ساتھی اداکاروں کے ساتھ تعلقات قائم کرنے سے گریز کرتے ہیں۔ ان کا کہنا تھا کہ شوبز کی پرمصروف اور دباؤ سے بھرپور فضا بعض اوقات لوگوں کے مزاج کو متاثر کرتی ہے اور ان کے لیے کسی ایسے شخص کے ساتھ تعلق مناسب نہیں جو اسی پیشے سے وابستہ ہو۔
میکال ذوالفقار نے پاکستانی ٹیلی ویژن پر بھی نمایاں کیریئر بنایا ہے اور ’سنگِ مر مر‘، ’شہرِ ذات‘، ’دیارِ دل‘ اور ’فراڈ‘ سمیت متعدد معروف ڈراموں میں اداکاری کی ہے۔
