پاکستان کرکٹ کے سابق کپتان شعیب ملک نے پاکستان کرکٹ بورڈ (پی سی بی) کی جانب سے دی گئی ڈومیسٹک کرکٹ کی مینٹور شپ سے استعفیٰ دینے کی تصدیق کر دی ہے۔
اپنے انسٹاگرام بیان میں شعیب ملک نے بتایا کہ انہوں نے دو ہفتے قبل تحریری طور پر استعفیٰ دیا تھا- 
اور یہ فیصلہ ذاتی مصروفیات اور دیگر ذمہ داریوں کے باعث کیا۔ ان کا کہنا تھا کہ وہ اپنی مینٹورشپ کی ذمہ داریاں پوری طرح نہیں نبھا پا رہے تھے، اس لیے انہوں نے خود کو اس کردار سے الگ کرنا مناسب سمجھا۔
شعیب ملک نے چیئرمین پی سی بی محسن نقوی سمیت تمام کرکٹ شائقین کا شکریہ ادا کرتے ہوئے کہا کہ یہ فیصلہ آسان نہیں تھا، لیکن ان کے نزدیک یہی درست وقت تھا۔
منگل کے روز اطلاعات سامنے آئیں کہ پی سی بی نے مینٹورز کو ان کے عہدوں سے فارغ کرنے کا فیصلہ کیا ہے۔ ذرائع کے مطابق چیئرمین پی سی بی نے مینٹورز کی کارکردگی کا جائزہ لینے کے بعد یہ فیصلہ کیا۔
ذرائع کا کہنا ہے کہ وقار یونس، شعیب ملک، ثقلین مشتاق، مصباح الحق اور سرفراز احمد کو مینٹور شپ سے فارغ کر دیا گیا ہے۔ تاہم مصباح الحق اور سرفراز احمد کو پی سی بی میں اہم ذمہ داریاں سونپنے پر غور کیا جا رہا ہے۔
