پنجاب کے سرکاری اسکولوں کے لیے مفت درسی کتابوں کی چھپائی میں تقریباً 60 فیصد کمی کا منصوبہ سامنے آیا ہے، حالانکہ صوبے میں طلبہ کی تعداد میں 25 لاکھ اضافے کا دعویٰ کیا گیا ہے۔
تعلیمی سال 2022-23 کے دوران 6 کروڑ سے زائد درسی کتابیں چھاپی گئی تھیں، تاہم تعلیمی سال 2027-28 کے لیے صرف 2 کروڑ 41 لاکھ کتابیں چھاپنے کی منصوبہ بندی کی گئی ہے۔
یہ کمی ایسے وقت میں سامنے آئی ہے جب پنجاب کے سرکاری اسکولوں میں طلبہ کی تعداد مبینہ طور پر ایک کروڑ پانچ لاکھ سے تجاوز کر چکی ہے۔ صوبائی وزیر تعلیم رانا سکندر حیات بھی طلبہ کی تعداد میں 25 لاکھ اضافے کا دعویٰ کر چکے ہیں۔
نئے منصوبے کے تحت پرائمری جماعتوں کے لیے تقریباً ایک کروڑ 48 لاکھ، چھٹی سے آٹھویں جماعت کے لیے 43 لاکھ جبکہ نویں اور دسویں جماعت کے لیے 32 لاکھ کتابیں چھاپی جائیں گی۔
پروگرام مانیٹرنگ اینڈ امپلیمینٹیشن یونٹ (PMIU) کے حکام کے مطابق کتابوں کی چھپائی میں کمی کی ایک وجہ بک بینک سسٹم ہے، جس کے تحت طلبہ سے واپس حاصل کی جانے والی کتابیں دوبارہ استعمال کی جاتی ہیں۔ حکام کا کہنا ہے کہ متعدد سرکاری اسکولوں کی آؤٹ سورسنگ کے باعث بھی نئی کتابوں کی طلب میں کمی آئی ہے۔
یہ فیصلہ اس وقت سامنے آیا ہے جب رواں سال طلبہ کو مفت کتابوں کی فراہمی میں تاخیر کی شکایات سامنے آ چکی ہیں۔ اکتوبر میں ایک علیحدہ رپورٹ میں پنجاب کے لیے تقریباً 8 لاکھ 39 ہزار درسی کتابوں کی کمی کی بھی نشاندہی کی گئی تھی۔
اب اہم سوال یہ ہے کہ آیا بک بینک میں موجود کتابیں اور نئی چھپائی کا منصوبہ آئندہ تعلیمی سال میں سرکاری اسکولوں کے تمام طلبہ کی ضروریات پوری کر سکیں گے یا نہیں۔
