سنگاپور کی کلاؤڈ کمپیوٹنگ کمپنی میگاسپیڈ انٹرنیشنل (Megaspeed International) نے تصدیق کی ہے کہ چینی کاروباری خاتون ایلس ہوانگ نے 30 اگست 2025 کو کمپنی چھوڑ دی تھی اور اب ان کا کمپنی میں کوئی عہدہ یا ذمہ داری نہیں ہے۔
یہ اعلان ایسے وقت میں سامنے آیا ہے جب ایلس ہوانگ کے سابق این ویڈیا (Nvidia) چیف ایگزیکٹو جینسن ہوانگ کے ساتھ مبینہ تعلقات اور چین کو جدید مصنوعی ذہانت (AI) چپس کی ممکنہ منتقلی کے الزامات پر عالمی سطح پر توجہ بڑھ رہی ہے۔
میگاسپیڈ نے اپنے بیان میں کہا کہ کمپنی ایلس ہوانگ کے ذاتی معاملات پر تبصرہ نہیں کرتی۔ کمپنی نے اپنے کاروبار، سپلائی چین اور عالمی سرگرمیوں سے متعلق حالیہ میڈیا رپورٹس کو بھی مسترد کرتے ہوئے کہا کہ ان دعوؤں کی تصدیق کے لیے قابلِ اعتماد شواہد موجود نہیں ہیں۔
کمپنی نے مزید بتایا کہ اس نے اپنے کاروباری معاملات اور قانونی تقاضوں کی جانچ کے لیے بیرونی قانونی ماہرین کی خدمات حاصل کر لی ہیں تاکہ مکمل اندرونی تحقیقات کی جا سکیں۔
میگاسپیڈ کو ان الزامات کے باعث بھی جانچ پڑتال کا سامنا ہے کہ جنوب مشرقی ایشیا میں اس کے کاروباری نظام کے ذریعے فراہم کی جانے والی جدید این ویڈیا چپس امریکی برآمدی پابندیوں کی خلاف ورزی کرتے ہوئے چینی صارفین تک پہنچ سکتی تھیں۔ تاہم کمپنی کا مؤقف ہے کہ اس کی تمام کاروباری سرگرمیاں قانونی ہیں۔
دوسری جانب سنگاپور کے حکام سرورز کی خریداری سے متعلق مبینہ غلط معلومات فراہم کرنے کے معاملے پر میگاسپیڈ کی تحقیقات کر رہے ہیں۔ حکام نے واضح کیا ہے کہ ایلس ہوانگ سے متعلق تحقیقات کاروباری معاملات کے حوالے سے تھیں، جاسوسی کے الزام میں نہیں۔
ادھر ایلس ہوانگ کے چینی انٹیلی جنس اداروں سے مبینہ تعلقات کے دعوے تاحال ثابت نہیں ہوئے، جبکہ چین نے ان الزامات کو مسترد کیا ہے۔
