رواں سال کی تیسری قومی انسداد پولیو مہم کل سے باقاعدہ طور پر شروع ہوگی، جس کا باضابطہ افتتاح وزیراعظم کی فوکل پرسن برائے انسداد پولیو، عائشہ رضا فاروق نے بچوں کو پولیو کے قطرے پلا کر کیا۔
نیشنل ایمرجنسی آپریشن سینٹر (EOC) کے مطابق یہ مہم 26 مئی سے یکم جون تک جاری رہے گی، جس کے دوران ساڑھے 4 کروڑ سے زائد بچوں کو پولیو سے بچاؤ کے قطرے پلانے کا ہدف مقرر کیا گیا ہے۔ اس مہم کا بنیادی مقصد ملک سے پولیو وائرس کا مکمل خاتمہ ہے۔
پولیو مہم پاکستان اور افغانستان میں بیک وقت منعقد کی جا رہی ہے، جہاں سرحدی علاقوں اور خانہ بدوش آبادیوں پر خصوصی توجہ دی جا رہی ہے۔
عائشہ رضا فاروق کا کہنا تھا کہ پولیو کا خاتمہ ایک قومی ترجیح اور ہم سب کی اجتماعی ذمہ داری ہے۔ انھوں نے کہا کہ انسداد پولیو مہم کا تسلسل بچوں کی قوت مدافعت بڑھانے اور وائرس کی روک تھام کے لیے نہایت ضروری ہے۔ والدین سے اپیل کی گئی ہے کہ وہ اپنے بچوں کو پولیو کے قطرے پلانے کے ساتھ ساتھ وٹامن اے کی اضافی خوراک بھی ضرور دیں۔
