کوئٹہ: وزیر اعلیٰ بلوچستان میر سرفراز بگٹی، کور کمانڈر بلوچستان لیفٹیننٹ جنرل راحت نسیم احمد خان اور دیگر اعلیٰ حکام نے یوم عاشور کے موقع پر سیکیورٹی انتظامات کا جائزہ لینے کے لیے سنٹرل پولیس آفس (سی پی او) کا دورہ کیا۔
دورے کے دوران وزیر اعلیٰ اور کور کمانڈر نے سی پی او میں قائم مانیٹرنگ روم کا معائنہ کیا اور اشتعال انگیز عناصر کی نقل و حرکت پر کڑی نظر رکھنے کی ہدایت دی۔ انہوں نے کہا کہ کسی بھی مشتبہ سرگرمی پر فوری کارروائی کی جائے۔
وزیر اعلیٰ سرفراز بگٹی نے جلوس کے روٹس، حساس مقامات اور داخلی و خارجی راستوں کی مؤثر نگرانی پر زور دیتے ہوئے سیکیورٹی اداروں کو ہدایت دی کہ وہ مکمل الرٹ رہیں، کیونکہ معمولی سی کوتاہی کے بھی سنگین نتائج ہو سکتے ہیں۔
انہوں نے کہا کہ تمام ادارے باہمی ہم آہنگی کے ساتھ اپنے فرائض سرانجام دے رہے ہیں اور حکومت، قانون نافذ کرنے والے ادارے اور عوام مل کر امن و امان کے قیام کے لیے کوشاں ہیں۔
وزیر اعلیٰ نے آئی جی پولیس کو ہدایت کی کہ مجالس، جلوسوں اور دیگر عوامی مقامات پر فول پروف سیکیورٹی ہر صورت یقینی بنائی جائے تاکہ شہریوں کو مکمل تحفظ فراہم کیا جا سکے۔
