بالی ووڈ کے معروف اداکار گووندا نے اہلیہ سنیتا آہوجا سے علیحدگی کی خبروں پر بالآخر ردعمل دے دیا، جس سے کئی دنوں سے گردش کرتی افواہوں کا سلسلہ ختم ہوگیا۔
ایک حالیہ تقریب میں گفتگو کرتے ہوئے اداکار نے طلاق کی خبروں کو یکسر مسترد کرتے ہوئے اپنی اہلیہ کو "گھر کی دیوی” قرار دیا۔ گووندا نے ہاتھ جوڑ کر کہا کہ جو کچھ بھی انہیں ملا ہے، وہ اپنی بیوی کی بدولت ہے اور وہ اسے اپنی سب سے بڑی نعمت سمجھتے ہیں۔
گووندا نے مزید کہا کہ چاہے مرد کتنا ہی پیسہ یا شہرت حاصل کرلے، اس کی اصل قسمت اس کی بیوی ہی ہوتی ہے۔ انہوں نے زور دے کر کہا کہ انہوں نے کبھی کسی عورت کی بےعزتی یا مخالفت نہیں کی۔
تقریب میں سنیتا آہوجا بھی اپنے شوہر کے ساتھ موجود تھیں اور انہوں نے کہا، "میرا شوہر صرف میرا ہے۔”
یہ وضاحت اس وقت سامنے آئی ہے جب بھارتی میڈیا اور سوشل پلیٹ فارمز پر کئی دنوں سے ان کی علیحدگی کی افواہیں گردش کر رہی تھیں۔ دونوں کی مشترکہ موجودگی اور بیانات نے ان قیاس آرائیوں کو ختم کر دیا ہے۔
