پاکستانی فلم و ٹی وی کی معروف اداکارہ نشو نے اپنی چوتھی شادی سے متعلق گردش کرنے والی خبروں پر خاموشی توڑتے ہوئے کہا ہے کہ وہ اس وقت زندگی سے لطف اندوز ہو رہی ہیں، تاہم اگر نصیب میں ہوا تو شادی ضرور کریں گی۔
ایک حالیہ انٹرویو میں جب ان سے پوچھا گیا کہ کیا انہوں نے خفیہ طور پر چوتھی شادی کر لی ہے تو اداکارہ نے واضح کیا کہ وہ اب تک موصول ہونے والی کئی پیشکشوں کو مسترد کر چکی ہیں لیکن ان کا ماننا ہے کہ اگر تقدیر میں لکھا ہے تو ایک اور شادی ہوسکتی ہے۔
نشو نے مزید کہا کہ ان کے بچوں کو اس فیصلے پر کوئی اعتراض نہیں اور شادی کا تعلق عمر سے نہیں بلکہ نصیب سے ہوتا ہے۔ ان کے بقول: "اگر اللہ نے مقدر میں لکھا ہے تو یہ ضرور ہوگی۔”
انہوں نے سعودی عرب کی مثال دیتے ہوئے کہا کہ وہاں بیوہ یا طلاق یافتہ عورت کی فوری شادی کرا دی جاتی ہے اور عورت کی متعدد شادیاں ہونا کوئی مسئلہ نہیں، مگر پاکستان میں نکاح کو بلاوجہ تنازع بنا دیا گیا ہے۔ "جب دین اجازت دیتا ہے تو ہچکچاہٹ کیوں؟ اگر نصیب میں ہوا تو چوتھی شادی بھی کروں گی،” انہوں نے کہا۔
یاد رہے کہ نشو کی پہلی شادی 1970 میں ہوئی تھی جو 1976 میں طلاق پر ختم ہوئی۔ 1978 میں انہوں نے مصنف تسلیم فضلی سے نکاح کیا مگر وہ 1982 میں وفات پا گئے۔ بعدازاں 1986 میں انہوں نے ہدایت کار جمال پاشا سے تیسری شادی کی جو 2019 میں انتقال کر گئے۔
گزشتہ کئی روز سے سوشل میڈیا پر ان کی ممکنہ چوتھی شادی کی خبریں زیرِ گردش ہیں جنہوں نے مداحوں اور شوبز حلقوں میں تجسس پیدا کر دیا ہے۔
