ستمبر 16، 2025
ویب ڈیسک
لاہور:
محکمہ موسمیات نے خبردار کیا ہے کہ پنجاب میں مون سون بارشوں کا 11واں اسپیل آج سے شروع ہو چکا ہے جو 19 ستمبر تک جاری رہے گا۔ اس دوران صوبے کے بیشتر شہروں میں گرج چمک کے ساتھ بارش کا امکان ہے۔
پی ڈی ایم اے کے ترجمان کے مطابق بارشوں کے اس سلسلے کے دوران راولپنڈی، مری، گلیات، اٹک، چکوال، جہلم، لاہور، گجرات اور سیالکوٹ سمیت کئی بڑے شہروں میں موسلادھار بارشیں متوقع ہیں۔ اسی طرح نارووال، حافظ آباد، اوکاڑہ، ساہیوال، قصور، جھنگ، سرگودھا اور میانوالی بھی بارشوں کی لپیٹ میں آئیں گے۔
ادارے نے متنبہ کیا ہے کہ 18 اور 19 ستمبر کو بالخصوص راولپنڈی، مری اور گلیات کے ندی نالوں میں پانی کے بہاؤ میں تیزی اور طغیانی کا خدشہ ہے۔
وزیراعلیٰ پنجاب کی ہدایات پر صوبے بھر کے کمشنرز اور ڈپٹی کمشنرز کو الرٹ کر دیا گیا ہے جبکہ محکمہ صحت، آبپاشی، تعمیرات و مواصلات، لوکل گورنمنٹ اور لائیو اسٹاک سمیت تمام اداروں کو ہائی الرٹ رہنے کی ہدایت جاری کی گئی ہے۔
ریلیف کمشنر پنجاب نبیل جاوید نے شہریوں کو مشورہ دیا ہے کہ وہ دریاؤں اور برساتی نالوں کے اطراف جانے سے گریز کریں، آندھی اور طوفان کی صورتحال میں محفوظ مقامات پر رہیں اور غیر ضروری سفر نہ کریں۔ کسی بھی ہنگامی صورتحال میں شہری پی ڈی ایم اے ہیلپ لائن 1129 پر رابطہ کر سکتے ہیں۔
