صنعا — یمن کے دارالحکومت صنعا اور الجوف گورنریٹ میں اسرائیلی فضائی حملوں کے نتیجے میں کم از کم 35 افراد شہید اور 130 سے زائد زخمی ہوگئے۔
الجزیرہ کے مطابق، اسرائیلی بمباری میں رہائشی علاقوں کو براہِ راست نشانہ بنایا گیا جن میں ایک طبی مرکز بھی شامل ہے۔ یمنی وزارتِ صحت کا کہنا ہے کہ جاں بحق اور زخمی ہونے والوں میں زیادہ تر عام شہری ہیں، جن میں خواتین اور بچے بھی شامل ہیں۔
یہ حملے ایسے وقت میں کیے گئے جب محض ایک روز قبل اسرائیل نے قطر کے دارالحکومت دوحہ میں حماس کی قیادت کو نشانہ بنانے کی کوشش کی تھی۔
اسرائیلی فوج نے ان حملوں کی ذمہ داری قبول کرتے ہوئے دعویٰ کیا کہ ہدف حوثی حکومت کے فوجی ٹھکانے تھے۔ تاہم حوثیوں کا کہنا ہے کہ اسرائیل ان پر دباؤ ڈال رہا ہے کہ وہ غزہ کے لیے اپنی حمایت ختم کر دیں، لیکن وہ جنگ بندی تک اپنی کارروائیاں جاری رکھیں گے۔
خیال رہے کہ گزشتہ ماہ بھی اسرائیلی حملے میں یمن کے وزیراعظم احمد الرحوی جاں بحق ہوگئے تھے۔ رپورٹس کے مطابق اسرائیل نے گزشتہ 72 گھنٹوں میں فلسطین، لبنان، شام، تیونس، قطر اور یمن سمیت چھ ممالک پر فضائی حملے کیے ہیں۔
