دوحہ — قطر کے وزیراعظم شیخ محمد بن عبدالرحمان الثانی نے کہا ہے کہ حالیہ اسرائیلی فضائی حملے نے یرغمالیوں کی رہائی کی تمام امیدوں کو ختم کر دیا ہے اور اس سے صورتحال مزید پیچیدہ ہوگئی ہے۔
امریکی ٹی وی کو دیے گئے انٹرویو میں قطری وزیراعظم نے کہا کہ یہ حملہ نہ صرف بین الاقوامی قوانین کی کھلی خلاف ورزی ہے بلکہ اس نے ان خاندانوں کو بھی مایوسی کی گہری کھائی میں دھکیل دیا ہے جو اپنے پیاروں کی رہائی کی امید لگائے بیٹھے تھے۔
ان کا کہنا تھا کہ حماس پر حملے کے بعد یرغمالیوں کا مستقبل مزید غیر یقینی ہو گیا ہے۔ "نیتن یاہو کو اپنے اقدامات کا حساب دینا ہوگا اور انہیں انصاف کے کٹہرے میں لایا جانا چاہیے۔”
یاد رہے کہ 9 ستمبر کو اسرائیل نے دوحہ میں فضائی حملہ کیا تھا، جس میں حماس کی مرکزی قیادت کو نشانہ بنانے کی کوشش کی گئی۔ اگرچہ قیادت محفوظ رہی، تاہم حماس کے مطابق چھ افراد جاں بحق ہوئے، جن میں رہنما خلیل الحیہ کے بیٹے اور ان کے دفتر کے ڈائریکٹر بھی شامل تھے۔ قطری وزارتِ داخلہ کے مطابق حملے میں ایک سیکیورٹی اہلکار بھی شہید اور ایک زخمی ہوا۔
