وزیرِاعلیٰ خیبر پختونخوا سہیل آفریدی نے راولپنڈی میں اڈیالہ روڈ پر دیگر رہنماؤں کے ساتھ دھرنا دے دیا، اس وقت جب پولیس نے انہیں اڈیالہ جیل کی طرف جانے سے روک دیا۔
اس دوران گورکھپور ناکے پر پولیس کی بھاری نفری تعینات رہی، جہاں سے آگے جانے کی اجازت نہ ملنے پر صورتحال میں کچھ کشیدگی بھی دیکھنے میں آئی۔ سہیل آفریدی نے مؤقف اپنایا کہ وہ جب تک عمران خان سے ملاقات کی اجازت نہیں ملتی، وہیں بیٹھے رہیں گے۔
سہیل آفریدی کا کہنا تھا کہ وہ سابق وزیرِاعظم عمران خان سے ملاقات کر کے ان کی صحت سے متعلق آگاہی حاصل کرنا چاہتے ہیں۔
دوسری جانب اڈیالہ جیل انتظامیہ نے تصدیق کی کہ آج ملاقات کا مقررہ وقت ختم ہو چکا ہے، اور وزیرِاعلیٰ کے پی سمیت کسی رہنما کو عمران خان سے ملاقات کی اجازت نہیں دی گئی۔
دھرنے کے دوران سہیل آفریدی کے ہمراہ صوبائی وزیر شفیع جان، رکنِ قومی اسمبلی شاہد خٹک، صوبائی وزیر مینا خان، شوکت یوسفزئی، امیراللّٰہ مروت اور شفقت عباس بھی موجود تھے۔
