اسلام آباد — پاکستان مسلم لیگ (ن) کے مرکزی رہنماء حمزہ شہباز شریف کو وفاقی حکومت میں ایک اہم اور بڑی ذمہ داری سونپنے کا فیصلہ کیا گیا ہے۔ ذرائع کے مطابق، وزیراعظم شہباز شریف کے بڑے صاحبزادے حمزہ شہباز کے لیے وزیراعظم ہاؤس میں ایک باضابطہ دفتر بھی مختص کر دیا گیا ہے، جہاں وہ پیر 27 جولائی سے اپنی نئی ذمہ داریاں سنبھالیں گے۔ سابق وزیراعلیٰ پنجاب کو وفاقی حکومت کے انتظامی دھارے میں شامل کرنے کا یہ اہم فیصلہ مسلم لیگ (ن) کے قائد نواز شریف کی خصوصی ہدایات پر کیا گیا ہے۔
ذرائع کا مزید کہنا ہے کہ وفاق میں اہم حکومتی عہدہ سنبھالنے کے ساتھ ساتھ حمزہ شہباز کو مسلم لیگ (ن) کے تنظیمی اور پارٹی معاملات کی نگرانی کا ٹاسک بھی دیا جائے گا۔ واضح رہے کہ حمزہ شہباز اس سے قبل اپریل سے جولائی 2022 تک پنجاب کے وزیراعلیٰ رہ چکے ہیں، جبکہ اس سے قبل وہ 2018 سے 2022 تک پنجاب اسمبلی میں قائدِ حزبِ اختلاف کے عہدے پر بھی فائز رہے۔ اس کے علاوہ وہ 2008 سے 2018 تک مسلسل قومی اسمبلی کے رکن (ایم این اے) بھی منتخب ہوتے رہے ہیں۔
