امیتابھ بچن کی سکیورٹی سخت، بلٹ پروف شیشے کے پیچھے مداحوں سے ملاقات، دھمکی آمیز ای میل نے ہلچل مچا دی!
ممبئی: بالی ووڈ کے شہنشاہ امیتابھ بچن کی سکیورٹی کے حوالے سے تشویش ناک اطلاعات سامنے آئی ہیں۔ معروف اداکار کو ممبئی میں اپنی رہائش گاہ جَلْسا کے باہر مداحوں سے ملاقات کے دوران بلٹ پروف شیشے کے حفاظتی حصار میں دیکھا گیا۔
دھمکی آمیز ای میل کے بعد سکیورٹی ہائی الرٹ
بھارتی میڈیا رپورٹس کے مطابق ممبئی کے میئر ریتو تاوڑے کو ایک دھمکی آمیز ای میل موصول ہوئی تھی، جس میں امیتابھ بچن کی رہائش گاہ جَلْسا سمیت مختلف مقامات کو نشانہ بنانے کی دھمکی دی گئی تھی۔
اس ای میل میں بی ایم سی ہیڈکوارٹرز، ایک اسکول اور گلوکار دلجیت دوسانجھ کے کنسرٹ کے مقام کا بھی ذکر کیا گیا تھا۔
دھمکی کے بعد پولیس نے متعلقہ مقامات کی تلاشی لی، تاہم بی ایم سی کی عمارت سے کوئی مشکوک چیز برآمد نہیں ہوئی۔
ابھیشیک بچن بھی والد کے ساتھ موجود
امیتابھ بچن کے بیٹے ابھیشیک بچن بھی اپنے والد کے ساتھ موجود تھے۔ وہ سکیورٹی انتظامات کا جائزہ لیتے دکھائی دیے، جبکہ امیتابھ بچن حفاظتی شیشے کے پیچھے سے مداحوں کو ہاتھ ہلا کر سلام کرتے رہے۔
مداحوں میں تشویش کی لہر
امیتابھ بچن کئی دہائیوں سے ہر اتوار اپنے گھر کے باہر جمع ہونے والے مداحوں سے ملاقات کرتے ہیں۔ لیکن اس مرتبہ بلٹ پروف شیشے کے حصار میں ان کی موجودگی نے مداحوں کو تشویش میں مبتلا کر دیا۔
بالی ووڈ کے شہنشاہ کی سکیورٹی کا یہ غیر معمولی انتظام فلمی دنیا میں نئی بحث کا باعث بن گیا ہے۔ مداح اپنے پسندیدہ اداکار کی سلامتی کے لیے دعائیں کر رہے ہیں۔
