دسمبر 4، 2025
ویب ڈیسک
پاکستان نے اپنی تاریخ میں پہلی بار بین الاقوامی قرت قرآن کا مقابلہ منعقد کیا، جس میں 37 ممالک کے قراء نے شرکت کی۔ اسلام آباد کنونشن سینٹر میں ہونے والی تقریب کا آغاز قاری سید صداقت علی کی تلاوت سے ہوا۔ ملیشیائی قاری نے پہلی پوزیشن حاصل کی۔
وفاقی وزیرِ مذہبی امور سردار یوسف نے دنیا بھر سے آئے ہوئے قراء کا خیرمقدم کیا اور کہا کہ اتنے ممالک سے شرکاء کا پاکستان آنا ملک کے لیے ایک اعزاز ہے۔ انہوں نے کہا کہ یہ مقابلہ بین الاقوامی سطح پر پاکستان کی مذہبی ہم آہنگی کے فروغ کا ثبوت ہے۔
ڈپٹی وزیرِ اعظم اسحاق ڈار نے کہا کہ یہ مقابلہ پاکستان کی مسلم امہ میں اتحاد اور روحانی اقدار کے فروغ کی کوششوں کی عکاسی کرتا ہے۔ انہوں نے کہا کہ پاکستان واحد ملک ہے جو کلمہ طیبہ کے نام پر قائم ہوا، اور نوجوانوں کو قرآن سے اپنا تعلق مزید مضبوط کرنا چاہیے_
پہلی پوزیشن ملیشیا کے قاری ایمن رضوان نے حاصل کی، دوسری ایران کے قاری عدنان کے حصے میں آئی اور تیسری پاکستان کے قاری عبدالرشید نے جیتی۔ افغانستان، انڈونیشیا اور مراکش کے شرکاء بالترتیب چوتھے، پانچویں اور چھٹے نمبر پر رہے۔ اسحاق ڈار اور سردار یوسف نے جیتنے والوں میں انعامات تقسیم کیے۔
