اسلام آباد، 9 اکتوبر (اے پی پی): انسٹی ٹیوٹ آف اسپیس ٹیکنالوجی (آئی ایس ٹی) نے ’’ورلڈ اسپیس ویک 2025‘‘ کا افتتاح کر دیا، جو پاکستان میں خلائی سائنس اور اختراعات کی سب سے بڑی سالانہ تقریب ہے۔ اس سال کا موضوع "خلاء میں زندگی” رکھا گیا ہے۔
یہ تقریب نیشنل سینٹر آف جی آئی ایس اینڈ اسپیس ایپلیکیشنز (این سی جی ایس اے) کی میزبانی میں، ہائر ایجوکیشن کمیشن (ایچ ای سی) اور سپارکو کے تعاون سے منعقد کی جا رہی ہے، جس کا مقصد ملک بھر کے طلبہ میں سائنسی جستجو اور علمِ فلکیات کے فروغ کو اُجاگر کرنا ہے۔
ڈاکٹر اے کیو خان ریسرچ لیبارٹریز کے سابق سائنسدان پروفیسر ڈاکٹر سید ولایت حسین اور پروفیسر ڈاکٹر احتزاز قمر نے تقریب کا افتتاح کیا اور آئی ایس ٹی کی خلائی تعلیم کے فروغ کے لیے کی جانے والی کوششوں کو سراہا۔
این سی جی ایس اے کے چیئرمین ڈاکٹر نجم عباس نقوی نے کہا کہ یہ تقریب پاکستان کے سائنسی جذبے کی عکاسی کرتی ہے اور نوجوانوں کو زمین سے باہر پائیدار زندگی کے بارے میں سوچنے کی ترغیب دیتی ہے۔
اس سال کے ورلڈ اسپیس ویک میں روبوٹکس، کوڈنگ، اسپیس آرٹ اور سیٹلائٹ ڈیزائن سمیت 50 سے زائد مقابلے شامل ہیں، جن میں ملک بھر کے 50 تعلیمی اداروں سے 2000 سے زائد طلبہ حصہ لے رہے ہیں۔
دوربین سے مشاہدے کے سیشنز، لیبارٹری وزٹس، اور خلائی نمائشوں نے اس ہفتہ بھر کی تقریب کو مزید دلچسپ بنا دیا ہے، جو پاکستان میں خلائی سائنس کے فروغ میں آئی ایس ٹی کے قائدانہ کردار کی تصدیق کرتی ہے۔
