گلوکارہ قرۃ العین بلوچ نے حالیہ دورہ گلگت بلتستان کے دوران ریچھ کے حملے کے بعد پہلا باضابطہ بیان جاری کردیا ہے۔
انسٹاگرام پر جاری بیان کے مطابق، بلوچ سیلاب متاثرین کی بحالی اور امدادی سرگرمیوں کے لیے جامع ڈیزاسٹر ریسپانس سروسز (سی ڈی آر ایس) کے ساتھ بلتستان گئی تھیں جہاں وہ متاثرہ دیہات میں امداد فراہم کر رہی تھیں۔
بیان میں بتایا گیا کہ 4 ستمبر کی رات دورانِ قیام، جب وہ خیمے میں موجود تھیں، ایک بھورا ریچھ اندر آ گیا اور ان پر حملہ کر دیا۔ سی ڈی آر ایس کی ٹیم نے فوری کارروائی کرتے ہوئے ریچھ کو بھگا دیا۔
واقعے کے بعد قرۃ العین بلوچ کو فوراً قریبی طبی مرکز منتقل کیا گیا، جہاں ڈاکٹروں نے تصدیق کی کہ ان کی حالت خطرے سے باہر ہے اور کوئی فریکچر نہیں ہوا۔ ان کی صحت تیزی سے بحال ہو رہی ہے۔
گلوکارہ کی ٹیم نے مداحوں سے دعاؤں کی اپیل کرتے ہوئے کہا ہے کہ اس وقت انہیں مکمل آرام اور پرائیویسی کی ضرورت ہے۔ ساتھ ہی ان کی تمام عوامی مصروفیات صحتیابی تک ملتوی کر دی گئی ہیں۔
