کانگریس کی سینئر رہنما سونیا گاندھی نے اپنی ذاتی زندگی، محبت، خاندانی سانحات اور سیاسی سفر کے حوالے سے ایک نایاب انٹرویو میں اہم انکشافات کیے ہیں۔ ان کا یہ انٹرویو ان کی یادداشتوں پر مبنی کتاب Belonging: A Journey of Love کی اشاعت کے موقع پر سامنے آیا ہے۔ سونیا گاندھی 1946 میں اٹلی میں پیدا ہوئیں اور 1968 میں راجیو گاندھی سے شادی کے بعد بھارت منتقل ہوئیں۔ انہوں نے بتایا کہ ان کی زندگی کا سفر محبت سے شروع ہوا اور وقت کے ساتھ بھارت اور گاندھی خاندان سے گہرا تعلق قائم ہو گیا۔
انٹرویو کے دوران سونیا گاندھی نے اپنی ساس اور سابق بھارتی وزیراعظم اندرا گاندھی کے 1984 میں قتل اور اپنے شوہر راجیو گاندھی کی 1991 میں خودکش حملے میں ہلاکت کے دردناک واقعات بھی یاد کیے۔ انہوں نے بتایا کہ وہ اپنے شوہر کے سیاست میں آنے کے سخت خلاف تھیں کیونکہ انہیں ان کی جان کو خطرہ لاحق ہونے کا خدشہ تھا۔ ان سانحات کے بعد انہوں نے کئی سال تک سیاسی اور عوامی سرگرمیوں سے دور رہنے کو ترجیح دی، تاہم 1998 میں کانگریس پارٹی کی قیادت سنبھال کر عملی سیاست میں واپس آ گئیں۔
سونیا گاندھی نے اپنے سیاسی سفر اور 2004 کے عام انتخابات میں کانگریس کی کامیابی کے بعد وزارتِ عظمیٰ کا عہدہ قبول نہ کرنے کے فیصلے پر بھی روشنی ڈالی۔ ان کی نئی کتاب میں محبت، وفاداری، غم اور اپنائیت جیسے جذبات کے ساتھ بھارت کی کئی دہائیوں پر محیط سیاسی تاریخ کا ذکر کیا گیا ہے۔ انہوں نے بھارتی جمہوریت کی موجودہ صورتحال پر تشویش کا اظہار کیا، تاہم ملک کے مستقبل کے حوالے سے امید ظاہر کی اور کہا کہ انہیں یقین ہے کہ عوام بہتر حکمرانی کا خیرمقدم کریں گے۔
