پاکستان میں جاری شدید گرمی کی لہر پر اداکار ایجاز اسلم کا مزاحیہ اور شاعرانہ ردعمل سوشل میڈیا پر وائرل ہو گیا۔ ایجاز اسلم نے مشہور شاعر مرزا غالب کے ایک معروف شعر کو گرمی کی شدت پر ڈھالتے ہوئے کچھ یوں پوسٹ کیا:
"ہزاروں خواہشیں ایسی کہ ہر خواہش پہ دم نکلے… بڑی سڑی ہوئی گرمی ہے، گھر سے باہر کم نکلے”
اداکار کا یہ تخلیقی انداز، جس میں اردو ادب اور روزمرہ حقیقت کو مزاحیہ رنگ میں پیش کیا گیا، صارفین کے دل کو چھو گیا۔ سوشل میڈیا پر یہ پوسٹ نہ صرف تیزی سے شیئر ہوئی بلکہ گرمی سے تنگ عوام کے لیے ہنسی کا باعث بھی بنی۔
ملک کے کئی علاقوں میں درجہ حرارت 45 ڈگری سینٹی گریڈ سے تجاوز کر چکا ہے، اور عوام کی ایک بڑی تعداد گرمی سے بچنے کے لیے گھروں میں محدود ہو گئی ہے۔ ایجاز اسلم کی یہ شاعرانہ چُٹکی ایسے وقت میں سامنے آئی جب پاکستان محکمہ موسمیات نے متعدد شہروں میں ریڈ الرٹ جاری کیے ہیں، اور عوام کو دوپہر کے اوقات میں غیر ضروری طور پر باہر نہ نکلنے کی ہدایت کی گئی ہے۔
گرمی کے باعث مختلف صوبوں میں اسکول بند کر دیے گئے ہیں جبکہ مزدوروں کے لیے بھی دوپہر کے وقت کام کرنے پر پابندی عائد کی گئی ہے۔ ان حالات میں ایجاز اسلم کی حسِ مزاح سے بھرپور پوسٹ نے نہ صرف حالات کی سنگینی کو ایک نرم پہلو سے پیش کیا بلکہ عوام کو ایک خوشگوار لمحہ بھی دیا۔
ایجاز اسلم، جو اکثر اپنے فکرمند اور دلچسپ سوشل میڈیا مواد کے لیے جانے جاتے ہیں، ایک بار پھر عوام سے جڑنے میں کامیاب ہوئے، اور ادب کے ذریعے روزمرہ مسائل کو اجاگر کرنے کا منفرد انداز اپنایا۔
