اسلام آباد: نیشنل ڈیزاسٹر مینجمنٹ اتھارٹی (این ڈی ایم اے) نے 13 جون سے 18 جون کے دوران ملک بھر میں متفرق موسمی حالات کی پیش گوئی کرتے ہوئے ایک موسمی ایڈوائزری جاری کی ہے، جس میں شدید گرمی، بارشوں اور آندھی طوفان کی وارننگ دی گئی ہے۔
پنجاب
پنجاب کے بیشتر علاقوں میں درجہ حرارت میں نمایاں اضافہ متوقع ہے، خاص طور پر 14 جون سے 16 جون کے درمیان۔ تاہم، بالائی علاقوں جیسے اسلام آباد، راولپنڈی، اور پوٹھوہار ریجن میں بارش کا امکان ہے جو عارضی ریلیف فراہم کرے گی۔
خیبر پختونخوا (کے پی)
خیبر پختونخوا کے زیادہ تر علاقے گرم اور خشک رہیں گے، اور درجہ حرارت میں مزید اضافہ متوقع ہے۔ تاہم، کئی اضلاع میں گرد آلود ہوائیں، گرج چمک کے ساتھ بارش اور آندھیاں متوقع ہیں، جن میں شامل ہیں:
چترال، دیر، ہری پور، کرک، کوہاٹ، کوہستان، خیبر، کرم، مانسہرہ، مہمند، نوشہرہ، مالاکنڈ، چارسدہ، ایبٹ آباد، بنوں، ہزارہ، پشاور، صوابی، سوات اور وزیرستان۔
سندھ اور بلوچستان
ان دونوں صوبوں میں شدید گرمی کا راج رہے گا اور اس عرصے کے دوران کسی بڑی موسمی تبدیلی کا امکان نہیں ہے۔
عوامی احتیاطی تدابیر
این ڈی ایم اے نے عوام اور متعلقہ اداروں کو مشورہ دیا ہے کہ وہ ممکنہ موسمی خطرات اور شدید گرمی سے بچاؤ کے لیے درج ذیل احتیاطی تدابیر پر عمل کریں:
زیادہ سے زیادہ پانی اور ٹھنڈی مشروبات استعمال کریں تاکہ جسم میں پانی کی کمی نہ ہو۔
دھوپ میں زیادہ دیر رہنے سے گریز کریں، خاص طور پر دن کے گرم ترین اوقات میں۔
بچوں، بزرگوں اور مریضوں کی صحت کا خاص خیال رکھیں۔
کبھی بھی بچوں یا پالتو جانوروں کو بند گاڑی میں تنہا نہ چھوڑیں۔
غیر ضروری باہر جانے سے پرہیز کریں، خاص طور پر شدید گرمی میں۔
اگر باہر جانا ضروری ہو تو ہلکے کپڑے پہنیں، چھتری یا ٹوپی کا استعمال کریں اور سن بلاک ضرور لگائیں۔
این ڈی ایم اے موسمی حالات پر نظر رکھے ہوئے ہے اور ضرورت کے مطابق مزید ہدایات جاری کرے گا۔
