کراچی: اے این ایف نے مختلف شہروں میں منشیات اسمگلنگ کے خلاف کارروائیاں کرتے ہوئے دو ملزمان کو گرفتار کرلیا اور مجموعی طور پر 390 کلو منشیات برآمد کرلی۔
ترجمان اے این ایف کے مطابق مانسہرہ میں کارروائی کے دوران ایک ملزم سے 400 گرام چرس ملی، جبکہ اس نے طلبہ کو منشیات فراہم کرنے کا اعتراف بھی کیا۔
کراچی میں کوریئر آفس پر برطانیہ کے لیے بک کیے گئے پارسل سے 124 گرام ہیروئن برآمد ہوئی۔ اسی طرح لاہور کے خیابانِ فردوسی روڈ پر کارروائی کے دوران ملزم سے 2 کلو آئس بھی تحویل میں لی گئی۔
ترجمان کے مطابق حیات آباد پشاور کے کوریئر آفس میں ساہیوال کے لیے بک کیے گئے پارسل سے ایک کلو آئس برآمد ہوئی، جبکہ ڈسٹرکٹ پشین کے علاقے علی زئی میں بڑی کارروائی کرتے ہوئے 387 کلو ہیروئن قبضے میں لی گئی۔
