“سابق اے ڈی سی آر سیالکوٹ اقبال سنگھیڑا پولیس حراست سے فرار کے بعد دوبارہ گرفتار”

لاہور: سابق ایڈیشنل ڈپٹی کمشنر ریونیو سیالکوٹ اقبال سنگھیڑا کو پولیس حراست سے فرار ہونے کے بعد دوبارہ گرفتار کرلیا گیا۔

ذرائع کے مطابق اقبال سنگھیڑا پر ایک نجی ہاؤسنگ سوسائٹی سے کروڑوں روپے رشوت لینے کا مقدمہ زیر سماعت ہے۔

پولیس حکام کے مطابق 13 نومبر کو ملزم کو لاہور سے راولپنڈی کی اینٹی کرپشن عدالت میں پیشی کے لیے لے جایا جارہا تھا جب وہ چکری موٹروے ریسٹ ایریا سے ڈرامائی انداز میں فرار ہوگیا۔

ملزم کے فرار کے بعد تھانہ چکری میں مقدمہ درج کیا گیا جس میں راولپنڈی پولیس کے اے ایس آئی سمیت چار اہلکاروں کو غفلت کے الزام میں نامزد کیا گیا۔

راولپنڈی پولیس نے ملزم کی گرفتاری کے لیے خصوصی ٹیم تشکیل دی تھی، جس نے کارروائی کرتے ہوئے اقبال سنگھیڑا کو گرفتار کر کے کوٹ لکھپت جیل منتقل کردیا۔