پشاور: اینٹی نارکوٹکس فورس (اے این ایف) نے منشیات اسمگلنگ کے خلاف مؤثر کارروائی کرتے ہوئے بھاری مقدار میں چرس برآمد کر کے ایک ملزم کو گرفتار کر لیا۔
اے این ایف کے ترجمان کے مطابق فورس گزشتہ کچھ عرصے سے پشاور اور باڑہ میں سرگرم منظم منشیات اسمگلر گروہ کے خلاف انٹیلی جنس بنیادوں پر کارروائیاں کر رہی تھی۔ یہ گروہ مختلف کیریئرز کے ذریعے پشاور سے ملاکنڈ تک منشیات کی ترسیل میں ملوث تھا۔
ترجمان کا کہنا ہے کہ مصدقہ خفیہ اطلاع پر پشاور میں عبدرہ کرکٹ گراؤنڈ کے قریب ریلوے لائن روڈ پر ایک مشکوک سوزوکی مہران گاڑی کو روکا گیا۔ تلاشی کے دوران گاڑی میں نصب لاؤڈ اسپیکر باکس سے مہارت سے چھپائے گئے چرس کے آٹھ پیکٹس برآمد ہوئے۔
اے این ایف کے مطابق ہر پیکٹ کا وزن 1200 گرام تھا جبکہ مجموعی طور پر 9.6 کلوگرام چرس قبضے میں لی گئی۔ کارروائی کے دوران پشاور سے تعلق رکھنے والے گاڑی کے ڈرائیور کو موقع پر ہی گرفتار کر لیا گیا۔
ترجمان نے مزید بتایا کہ گرفتار ملزم کے خلاف انسدادِ منشیات ایکٹ 1997 کے تحت مقدمہ درج کر کے مزید تفتیش شروع کر دی گئی ہے۔
