راولپنڈی: تھانہ واہ کینٹ کے علاقے میں پیرودھائی جرگہ قتل کیس طرز کی ایک اور دل دہلا دینے والی واردات سامنے آ گئی، جہاں غیرت کے نام پر ایک شادی شدہ خاتون کو مبینہ تعلقات کے شبے میں قطر سے پاکستان بلا کر قتل کر دیا گیا۔
پولیس کے مطابق مقتولہ کی شناخت سمیرہ عزیز کے نام سے ہوئی ہے، جسے اس کے والد کے گھر میں فائرنگ کر کے قتل کیا گیا۔ فائرنگ میں مقتولہ کے والد کے قریبی عزیز ملوث تھے۔
تحقیقات کے مطابق مقتولہ کے چچا اور شوہر، جو قطر میں مقیم ہیں، فون اور ویڈیو کال کے ذریعے قتل کے احکامات دیتے اور سہولت کاری کرتے رہے۔
سی پی او راولپنڈی خالد ہمدانی نے واقعے کا نوٹس لیتے ہوئے پولیس کی مدعیت میں مقدمہ درج کرنے اور جامع تفتیش کا حکم دیا۔ مقدمہ سب انسپکٹر آصف اقبال خان کے بیان پر درج کیا گیا۔
ایف آئی آر کے متن کے مطابق سمیرہ عزیز ایک ہفتہ قبل اپنے شوہر سلیمان اور چچوں شوکت اور فیصل کے ہمراہ قطر سے پاکستان آئی تھی۔ شام کے وقت ملزمان ولید، اسرار اور صابر گھر آئے اور آپس میں مشاورت کی۔
مقتولہ کی ہمشیرہ ثناء خان کے مطابق اسی دوران قطر سے سلیمان کی ویڈیو کال آئی، جس میں چچی سعیدہ کو سمیرہ کو قتل کرنے کی ہدایت دی گئی۔
بعد ازاں ولید اور اسرار نے پسٹل سے سمیرہ عزیز پر فائرنگ کی، جس کے نتیجے میں وہ متعدد گولیاں لگنے سے موقع پر ہی جاں بحق ہو گئی۔
واقعے کے بعد ملزمان فرار ہو گئے، جبکہ مقتولہ کی لاش کو چچا شوکت اور فیصل ہسپتال منتقل کر گئے۔
پولیس نے قتل، غیرت کے نام پر قتل اور اعانتِ جرم کی دفعات کے تحت مقدمہ درج کر لیا ہے، جبکہ ملزمان کی گرفتاری کے لیے چھاپے مارے جا رہے ہیں۔ مقتولہ کا چچا امتیاز اور شوہر سلیمان بیرون ملک مقیم ہیں۔
