عالمی یومِ اطفال کے موقع پر جمعرات 19 نومبر کو صبح 10 بجے میری ٹائم میوزیم، کارساز روڈ کراچی میں ایک شاندار تقریب منعقد کی جائے گی، جس میں تقریباً 7 ہزار بچوں کی شرکت متوقع ہے۔ تقریب کا اہتمام ڈائریکٹوریٹ آف پرائیویٹ انسٹیٹیوشنز سندھ اور آل سندھ پرائیویٹ اسکولز اینڈ کالجز ایسوسی ایشن کے اشتراک سے کیا جا رہا ہے۔
یہ پروگرام وزیر تعلیم سندھ سید سردار علی شاہ کی خصوصی ہدایات کے تحت منعقد کیا جا رہا ہے، جس کا بنیادی پیغام ہے کہ تعلیم، ہنر، عزت اور صحت ہر بچے کا بنیادی حق ہے۔ اس سال عالمی یومِ اطفال کی مناسبت سے بین الاقوامی تھیم ’’میرا دن، میرے حقوق اور میرا مستقبل‘‘ کو مرکزی حیثیت دی گئی ہے، جس کا مقصد بچوں کے حقوق، تعلیم، صحت اور روشن مستقبل کے حوالے سے شعور اجاگر کرنا ہے۔
تقریب میں محکمہ تعلیم اور تعلیمی بورڈز کے اہم عہدیداران سمیت مختلف معزز شخصیات شرکت کریں گی۔ اس موقع پر ڈائریکٹر جنرل پرائیویٹ انسٹیٹیوشنز سندھ پروفیسر افضال انصاری، چیئرمین بورڈ آف انٹرمیڈیٹ ایجوکیشن کراچی پروفیسر فقیر محمد لاکھو، چیئرمین بورڈ آف سیکنڈری ایجوکیشن کراچی پروفیسر مشرف علی راجپوت اور مانیٹرنگ آفیسر پرائیویٹ انسٹیٹیوشنز اخلاق احمد بھی موجود ہوں گے۔
تقریب کا مقصد بچوں کے بنیادی حقوق کے حوالے سے آگاہی پیدا کرنا اور اس بات پر زور دینا ہے کہ ہر بچے کو معیاری تعلیم، صحت کی سہولیات، ہنر سیکھنے کے مواقع اور محفوظ ماحول فراہم کیا جائے۔ ہزاروں بچوں کی شرکت سے یہ تقریب بچوں کی صلاحیتوں کو اجاگر کرنے اور ان کے حقوق کے تحفظ کے عزم کو فروغ دینے کا اہم موقع ثابت ہوگی۔
