ممبئی – بھارتی میڈیا کے مطابق ویب سیریز راگنی ایم ایم ایس ریٹرنز سے شہرت حاصل کرنے والی اداکارہ کرشمہ شرما چلتی ہوئی لوکل ٹرین سے چھلانگ لگانے کے باعث شدید زخمی ہوگئیں۔
اداکارہ نے اسپتال سے انسٹاگرام پر ایک تصویر شیئر کرتے ہوئے اس واقعے کی تصدیق کی اور مداحوں کو اپنی حالت سے آگاہ کیا۔ کرشمہ نے بتایا کہ وہ اپنے دوستوں کے ساتھ لوکل ٹرین میں سفر کر رہی تھیں تاہم اچانک پیش آنے والی صورتِ حال میں گھبراہٹ کے باعث حادثہ پیش آیا۔ ان کے دوست ٹرین میں سوار نہ ہوسکے اور ٹرین چل پڑی، جس پر انہوں نے چھلانگ لگا دی اور زخمی ہوگئیں۔
اپنے بیان میں کرشمہ نے بتایا کہ ان کے جسم پر شدید چوٹیں آئیں، سر پر چوٹ لگنے سے سوجن ہوگئی جبکہ کمر پر بھی زخم آئے اور بدن پر جگہ جگہ نیل پڑ گئے۔ انہوں نے مداحوں سے جلد صحتیابی کی دعا کرنے کی درخواست کی۔
اس واقعے نے بھارت کی مصروف لوکل ٹرینوں میں مسافروں کی حفاظت سے متعلق خدشات کو ایک بار پھر اجاگر کردیا ہے جہاں بھیڑ اور حادثات عام ہیں۔
