کراچی میں تین روزہ کیپیسٹی ڈیولپمنٹ ورکشاپ کا کامیاب اختتام ہوا جس کا مقصد سندھ بھر میں تصوراتی اور صلاحیت پر مبنی امتحانات کو فروغ دینا تھا۔
اس ورکشاپ کا انعقاد انٹر بورڈ کوآرڈینیشن کمیشن (IBCC) اور آغا خان یونیورسٹی ایگزامینیشن بورڈ (AKU-EB) کے اشتراک سے کیا گیا، جس میں سندھ کے مختلف تعلیمی بورڈز سے اساتذہ کو مدعو کیا گیا تاکہ انہیں ماڈل اسیسمنٹ فریم ورک (MAF) پر تربیت دی جا سکے۔
تربیتی سیشنز میں اساتذہ کو جدید، تصوراتی اور مہارت پر مبنی امتحانات کے لیے تیار کرنے پر زور دیا گیا تاکہ پاکستان میں امتحانات کا معیار بہتر بنایا جا سکے۔
اختتامی تقریب میں چیف گیسٹ ڈاکٹر نوید یوسف (سی ای او، آغا خان یونیورسٹی اینڈ ایگزام بورڈز) اور مہمانِ خصوصی رحیم بخش میتلو (ایڈیشنل سیکریٹری، یونیورسٹیز اینڈ بورڈز، سندھ) نے ملک میں امتحانی نظام کو جدید بنانے کی اہمیت پر روشنی ڈالی۔
IBCC کراچی کے ڈائریکٹر جنرل محمد اعجاز احسن نے روایتی تعلیم کے ساتھ ہم نصابی سرگرمیوں، سماجی ذمہ داری، کھیل اور قیادت کی تربیت شامل کرنے کی ضرورت پر زور دیا۔
ورکشاپ کے اختتام پر اس بات کا عزم کیا گیا کہ ملک بھر میں طلبہ کے بہتر تعلیمی تجربے کے لیے ترقی پسند اور بین الاقوامی معیار کے مطابق امتحانی نظام کو نافذ کیا جائے گا۔
