ڈھاکہ: بنگلہ دیش کی سابق وزیراعظم شیخ حسینہ واجد نے نئی دہلی میں بنگلہ دیشی ہائی کمیشن سے نئے پاسپورٹ اور قومی شناختی کارڈ (این آئی ڈی) کے اجرا کی درخواست دے دی ہے، جسے دسمبر میں وطن واپسی کے ان کے ارادے کا اب تک کا واضح ترین اشارہ قرار دیا جا رہا ہے۔
رپورٹس کے مطابق شیخ حسینہ کے لندن میں مقیم قانونی نمائندوں نے پیر کے روز قائم مقام ہائی کمشنر پریتی رحمان کو خط ارسال کیا، جس میں نئے سفری اور شناختی دستاویزات جاری کرنے کی درخواست کی گئی ہے۔ اطلاعات کے مطابق اگست 2024 میں بنگلہ دیش چھوڑنے کے بعد ان کی سابقہ دستاویزات منسوخ کر دی گئی تھیں۔
شیخ حسینہ، جو طلبہ کی قیادت میں ہونے والی عوامی تحریک کے نتیجے میں 15 سالہ اقتدار کے خاتمے کے بعد بھارت منتقل ہوگئی تھیں، متعدد بار وطن واپس آنے اور قانونی کارروائی کا سامنا کرنے کے عزم کا اظہار کر چکی ہیں۔ ان کے قریبی ذرائع کے مطابق واپسی کی حتمی تاریخ ضروری قانونی اور انتظامی مراحل مکمل ہونے کے بعد بتائی جائے گی۔
تاہم بنگلہ دیشی حکومت نے ان کی پاسپورٹ درخواست کی مخالفت کی ہے۔ وزیر مملکت برائے خارجہ امور ہمایوں کبیر نے حسینہ کو مفرور قرار دیتے ہوئے کہا ہے کہ ڈھاکہ چاہتا ہے کہ بھارت موجودہ حوالگی معاہدے کے تحت انہیں بنگلہ دیش کے حوالے کرے۔
واضح رہے کہ نومبر 2025 میں بنگلہ دیش کے انٹرنیشنل کرائمز ٹریبونل نے 2024 میں طلبہ مظاہرین کے خلاف کریک ڈاؤن میں مبینہ کردار پر شیخ حسینہ کو ان کی غیر موجودگی میں سزائے موت سنائی تھی۔ حسینہ نے الزامات مسترد کرتے ہوئے عدالتی کارروائی کی قانونی حیثیت کو بھی چیلنج کیا ہے۔
ان کی ممکنہ وطن واپسی بنگلہ دیش میں ایک بار پھر سیاسی اور قانونی کشیدگی کو جنم دے سکتی ہے، جہاں ان کی جماعت عوامی لیگ پر پابندی عائد ہے اور متعدد سینئر رہنما جیلوں میں یا جلاوطنی کی زندگی گزار رہے ہیں۔
یہ پیش رفت ایسے وقت میں سامنے آئی ہے جب حسینہ کو بھارت میں پناہ دینے کے بعد ڈھاکہ اور نئی دہلی کے تعلقات پہلے ہی تناؤ کا شکار ہیں۔
شیخ حسینہ کی وطن واپسی کی کوششوں اور بنگلہ دیشی حکومت کی جانب سے ان کی حوالگی کے مطالبے کے باعث آنے والے ہفتے ملک کی سیاسی صورتحال اور بھارت کے ساتھ تعلقات کے حوالے سے انتہائی اہم ثابت ہو سکتے ہیں
