خانیوال: خانیوال میں پیش آئے افسوسناک واقعے میں سسر نے گھریلو ناچاقی پر بہو پر تیزاب پھینک دیا۔
پنجاب کی وزیراعلیٰ مریم نواز شریف کی ہدایت پر حنا پرویز بٹ نے واقعے کا نوٹس لیتے ہوئے ڈی پی او خانیوال سے تفصیلی رپورٹ طلب کی۔ پولیس نے بروقت کارروائی کرتے ہوئے ملزم کو گرفتار کر لیا۔
پولیس حکام کے مطابق ملزم نے دورانِ تفتیش جرم کا اعتراف بھی کر لیا ہے۔
حنا پرویز بٹ نے کہا کہ تیزاب پھینکنا سنگین جرم ہے اور ایسڈ کنٹرول بل 2025 کے تحت 14 سال قید اور 5 لاکھ روپے جرمانے کی سزا مقرر ہے۔ ان کے مطابق ایسے درندہ صفت عناصر کسی رعایت کے مستحق نہیں۔
انہوں نے کہا کہ پنجاب ویمن پروٹیکشن اتھارٹی متاثرہ خاتون کو قانونی، طبی اور نفسیاتی معاونت فراہم کرے گی، جبکہ پولیس شفاف تفتیش اور فوری چالان کو یقینی بنائے گی۔
انہوں نے واضح کیا کہ خواتین پر تشدد کے تمام کیسز میں زیرو ٹالرنس پالیسی پر سختی سے عمل کیا جا رہا ہے۔
