علیگڑھ انسٹیٹیوٹ آف ٹیکنالوجی، کراچی میں ایک باوقار اور جذبۂ انسانیت سے لبریز بلڈ ڈونیشن کیمپ کا انعقاد کیا گیا، جس کا مقصد چائلڈ ایڈ ایسوسی ایشن کے زیرِ علاج کینسر کے بچوں کے لیے خون کا بندوبست کرنا تھا۔
یہ کیمپ انسٹیٹیوٹ کے شعبہ DIIL، گائیڈنس سینٹر اور چائلڈ ایڈ ایسوسی ایشن (CAA) کے باہمی اشتراک سے منعقد کیا گیا۔
اس موقع پر انسٹیٹیوٹ کے پرنسپل شاہد جمیل نے کہا کہ خون کا ایک ایک قطرہ کسی معصوم جان کی زندگی بچا سکتا ہے۔ چائلڈ ایڈ ایسوسی ایشن کی ریسورس ڈیولپمنٹ مینیجر تزئین یوسفی نے ادارے کے مشن پر روشنی ڈالتے ہوئے بتایا کہ CAA پاکستان کا وہ معتبر ادارہ ہے جو کینسر میں مبتلا بچوں کو 100 فیصد مفت علاج فراہم کر رہا ہے۔ ان کے مطابق بچوں کا کینسر بڑوں سے مختلف ہوتا ہے اور بروقت علاج سے قابلِ شفا بھی ہے۔
کیمپ کے کنوینئر سید محمد محسن کاظم نے کہا کہ نوجوانوں کو خدمتِ انسانیت جیسے عظیم مقصد میں شامل کرنا وقت کی اہم ضرورت ہے، اور یہ کیمپ اسی جذبے کا مظہر ہے۔
کیمپ کا افتتاح چانسلر سرسید یونیورسٹی محمد اکبر علی خان اور محترمہ ارم اکبر خان نے کیا۔ دورہ کے دوران انہوں نے کیمپ کے انتظامات کو سراہا اور کہا کہ طلبہ و عملے کی بڑی تعداد کا خون عطیہ کرنا معاشرتی آگاہی اور ہمدردی کے جذبے کی علامت ہے۔
