راجن پور میں پولیس نے ڈاکوؤں کے خلاف رات گئے کارروائی کرتے ہوئے کچے کے علاقے میں 17 ٹھکانوں کو تباہ کر دیا۔
ڈی پی او راجن پور محمد عمران کے مطابق کچے میں پنجاب اور سندھ پولیس کا مشترکہ آپریشن جاری ہے، جس کے دوران گزشتہ رات پانچ افراد کو بازیاب کرایا گیا۔ ابتدائی طور پر بازیاب افراد میں ایک ڈاکٹر اور ایک ڈسپنسر کو بھی مغوی قرار دیا گیا تھا۔
ڈی پی او کے مطابق آپریشن کے دوران ڈاکوؤں کے 17 ٹھکانوں کو مسمار کیا گیا جبکہ کارروائی کے دوران بھاری اسلحہ بھی برآمد ہوا، جس میں راکٹ لانچر، اینٹی ایئرکرافٹ گنز اور آر پی جی شامل ہیں۔
دوسری جانب ایس ایس پی انور کھیتران نے وضاحت کرتے ہوئے کہا کہ بازیاب ڈاکٹر اور ڈسپنسر مغوی نہیں تھے بلکہ ڈاکوؤں کے سہولت کار تھے۔ ان کے مطابق دونوں افراد ڈاکوؤں کا علاج معالجہ کرتے رہے اور بعد ازاں خود کو مغوی ظاہر کرنے کا ڈرامہ رچایا۔
ایس ایس پی نے بتایا کہ ڈاکٹر اور ڈسپنسر کا تعلق صادق آباد کے علاقے نواز آباد سے ہے اور پولیس آپریشن کے دوران ڈرون حملے میں دونوں زخمی ہوئے۔
