ساہیوال میں زمین کے ٹھیکے کی رقم لینے کے لیے جانے والی پولیس ملازم کی بیوہ کو مبینہ طور پر پیٹرول چھڑک کر زندہ جلانے کا واقعہ سامنے آیا ہے۔
پولیس کے مطابق یہ واقعہ دو روز قبل نواحی گاؤں 70 فور آر میں پیش آیا، جہاں جنت بی بی نامی خاتون پر پیٹرول ڈال کر آگ لگائی گئی۔ شدید زخمی حالت میں اسپتال منتقل کی گئی جنت بی بی زخموں کی تاب نہ لاتے ہوئے دو روز بعد دم توڑ گئی۔
درج ایف آئی آر کے مطابق جنت بی بی اپنی زمین کے ٹھیکے کی رقم لینے حق نواز کے گھر پہنچی، جہاں تلخ کلامی کے بعد حق نواز، عمر اور ایک خاتون نے مبینہ طور پر اسے آگ لگا دی۔
پولیس حکام کا کہنا ہے کہ واقعے کی ہر پہلو سے تفتیش جاری ہے اور جلد تمام حقائق سامنے لائے جائیں گے۔ تھانہ نورشاہ پولیس نے ایک خاتون سمیت تین ملزمان کے خلاف مقدمہ درج کرکے ایک ملزم کو گرفتار کرلیا ہے۔
