کراچی: پاکستان کسٹمز انفورسمنٹ نے انسدادِ اسمگلنگ مہم کے دوران کامیاب انٹیلیجنس بيسڈ کارروائی کرتے ہوئے بڑی مقدار میں اسمگل شدہ سپاری برآمد کر لی۔
ترجمان کے مطابق کارروائی علی الصبح جوڑیا بازار کی برتن گلی میں قائم گوداموں پر کی گئی، جہاں سے 310 بوروں میں رکھی 3 ہزار 720 کلوگرام سپاری قبضے میں لے لی گئی۔ کلکٹر کسٹمز معین الدین وانی کے مطابق ضبط کی گئی سپاری کی مالیت 55 لاکھ 80 ہزار روپے بنتی ہے۔
حکام کا کہنا ہے کہ یہ سپاری گوداموں سے شہر کے مختلف علاقوں میں سپلائی کی جاتی تھی۔ کسٹمز نے مقدمہ درج کرکے برآمد شدہ مال کو سرکاری تحویل میں لے لیا ہے۔
