کراچی: گلشن معمار کے علاقے ناردرن بائی پاس پیر بخش سموں گوٹھ میں ڈکیتی کے دوران فائرنگ سے ایک شہری جاں بحق ہوگیا، واقعے کا مقدمہ مقتول کے کزن کی مدعیت میں درج کر لیا گیا ہے۔
ابتدائی اطلاعات کے مطابق مقدمہ گلشن معمار تھانے میں درج کیا گیا، جس میں 15 سے 16 نامعلوم مسلح ملزمان کو نامزد کیا گیا ہے۔ ایف آئی آر میں بیان کیا گیا ہے کہ 58 سالہ نور بہادر ولد حیات خان صبح ساڑھے 10 بجے کے قریب پیش آنے والے واقعے کے دوران گولی لگنے سے شدید زخمی ہوا۔
مقدمہ کے مدعی اسامہ نے پولیس کو بتایا کہ وہ لکڑی کا ٹال چلاتا ہے اور والد کے انتقال پر گاؤں سے رشتہ دار آئے ہوئے تھے۔ اسی دوران مسلح افراد لکڑی کے ٹال میں داخل ہوئے، خاندان کے چار افراد کو نیند سے جگایا اور نقدی و موبائل فون چھین لیے۔
ملزمان نے گھر اور ڈیرے کا دروازہ کھولنے کا مطالبہ کیا۔ جیسے ہی نور بہادر نے ڈیرے کا گیٹ کھولا، حملہ آوروں نے اس کے سر پر فائر کر دیا۔ ملزمان ڈیرہ باہر سے بند کر کے موقع سے فرار ہوگئے۔
زخمی نور بہادر کو نجی اسپتال اور بعد ازاں سول اسپتال منتقل کیا گیا، جہاں وہ دوران علاج دم توڑ گیا۔ پولیس نے قتل اور ڈکیتی کی دفعات کے تحت مقدمہ درج کرکے تفتیش شروع کر دی ہے۔ مدعی نے مطالبہ کیا ہے کہ ملزمان کو جلد از جلد گرفتار کر کے سخت قانونی کارروائی کی جائے۔
