لاہور: پنجاب کے دارالحکومت لاہور اور اس کے گردونواح میں زلزلے کے جھٹکے محسوس کیے گئے، جن کی شدت 4.4 ریکارڈ کی گئی۔ زلزلے کا مرکز لاہور کے جنوب مغرب میں تھا جبکہ گہرائی 14 کلومیٹر بتائی گئی ہے۔
ڈان نیوز کے مطابق زلزلے کے جھٹکے صبح 11 بج کر 39 منٹ پر محسوس کیے گئے، جس سے شہری خوفزدہ ہو کر کلمہ طیبہ پڑھتے ہوئے گھروں اور دفاتر سے باہر نکل آئے۔ لاہور کے علاوہ قصور، اوکاڑہ، ننکانہ صاحب، مریدکے، کامونکی اور شیخوپورہ میں بھی جھٹکے رپورٹ ہوئے ہیں۔
پی ڈی ایم اے کے ڈائریکٹر جنرل نے بتایا کہ صوبے بھر میں عمارتوں کی جانچ جاری ہے اور ممکنہ آفٹر شاکس کے پیش نظر مشینری اور عملہ الرٹ پر ہے۔
یاد رہے کہ حالیہ ہفتوں میں کراچی، خیبرپختونخوا اور بلوچستان میں وقفے وقفے سے زلزلے محسوس کیے جا رہے ہیں، تاہم پنجاب میں ایسے جھٹکوں کی تعداد کم رہی ہے۔ تازہ زلزلہ اس رجحان میں ایک نئی پیش رفت ہے، جس نے کئی شہروں کو متاثر کیا۔
