لاہور: جانوروں پر تشدد اور حبسِ بے جا، ہنجروال سے تین ملزمان گرفتار

لاہور: ہنجروال کے علاقے مرغزار کالونی میں جانوروں کو حبسِ بے جا میں رکھنے، بھوکا رکھنے اور تشدد کا نشانہ بنانے کے الزام میں پولیس نے تین افراد کو گرفتار کر لیا ہے۔

پولیس کے مطابق گرفتار ملزمان علی رضا، کاشف اور حسن علی ایک مبینہ کلینک چلا رہے تھے۔ کارروائی کے دوران ملزمان کے قبضے سے 10 بلیاں، 3 کتیا اور ان کے بچے برآمد کیے گئے، جبکہ 5 بلیوں کے بچے مردہ حالت میں پائے گئے۔

ایف آئی آر کے مطابق ملزمان نے اعتراف کیا کہ وہ جانوروں کی ویڈیوز بنا کر سوشل میڈیا پر اپلوڈ کرتے تھے۔ پولیس کا کہنا ہے کہ ملزم حسن علی خود کو جعلی ڈاکٹر ظاہر کر کے جانوروں کا معائنہ بھی خود ہی کرتا تھا۔

پولیس کے مطابق خراب حالت میں موجود حاملہ بلیوں کو ریسکیو کر لیا گیا ہے۔ تینوں ملزمان کو حراست میں لے کر مزید تفتیش شروع کر دی گئی ہے۔

ہنجروال پولیس نے سب انسپکٹر محمد بلال یحییٰ کی مدعیت میں ملزمان کے خلاف مقدمہ درج کر لیا ہے۔