لاہور کے علاقے اسلام پورہ میں پولیس نے بروقت کارروائی کرتے ہوئے طالبہ کو ہراساں اور دست درازی کرنے والے دو ملزمان کو گرفتار کر لیا، جبکہ واقعے کی سی سی ٹی وی فوٹیج بھی منظرِ عام پر آ گئی۔
پولیس کے مطابق موٹر سائیکل سوار ملزمان نے گلی سے گزرتی طالبہ کو ہراساں کیا، نازیبا جملے کسے اور دست درازی کے بعد موقع سے فرار ہو گئے۔ واقعے کی سی سی ٹی وی فوٹیج میں ملزمان کو واردات کے بعد فرار ہوتے دیکھا جا سکتا ہے۔
ایس ایچ او اسلام پورہ فریاد اشرف نے اطلاع ملتے ہی فوری کارروائی کی۔ ایس پی سٹی بلال احمد کے مطابق سی سی ٹی وی کیمروں اور تفتیش کی مدد سے ملزمان حسن اور عمر کو ٹریس کر کے گرفتار کر لیا گیا۔
ایس پی سٹی نے ملزمان کو گرفتار کرنے والی پولیس ٹیم کی کارکردگی کو سراہتے ہوئے کہا کہ خواتین سے ہراسانی اور بدتمیزی کسی صورت برداشت نہیں کی جائے گی، اور خواتین کے تحفظ کے لیے زیرو ٹالرنس پالیسی پر سختی سے عمل کیا جا رہا ہے۔
