ڈاکٹر ماہیرا عبدالغنی نے کیمبرج یونیورسٹی سے مٹیریل سائنس اور میٹالرجی میں پی ایچ ڈی حاصل کرکے پاکستان کی پہلی خاتون ہونے کا اعزاز حاصل کرلیا، جو پاکستانی خواتین کے لیے ایک تاریخی کامیابی ہے۔
ان کی ڈاکٹریٹ کی تحقیق دو جہتی (2D) مٹیریلز پر مرکوز رہی، جو جدید الیکٹرانکس میں درپیش اہم چیلنجز سے نمٹنے اور اگلی نسل کے آلات کے لیے نینو فیبری کیشن کے میدان کو آگے بڑھانے میں اہم کردار ادا کرتی ہے۔
ڈاکٹر ماہیرا نے پاکستان سے انجینئرنگ کی ڈگری حاصل کی اور بعد میں جرمنی اور فرانس میں مشہور ایرسمس منڈس اسکالرشپ پروگرام کے تحت اعلیٰ تعلیم حاصل کی، جو دنیا بھر کے ممتاز طلبہ کو دیا جاتا ہے۔
یہ سنگ میل نہ صرف پاکستان کے لیے باعثِ فخر ہے بلکہ پاکستانی خواتین کی عالمی تحقیق اور اختراعات میں بڑھتی ہوئی اہمیت کو اجاگر کرتا ہے۔ ڈاکٹر ماہیرا کی کامیابی نوجوان لڑکیوں کے لیے ایک روشن مثال ہے جو سائنس اور ٹیکنالوجی میں اپنا نام بنانے کی خواہشمند ہیں۔
