جنیوا — 78ویں ورلڈ ہیلتھ اسمبلی کے موقع پر وفاقی وزیر صحت سید مصطفیٰ کمال نے چین کے وزیر صحت سے اہم ملاقات کی۔ اس ملاقات میں صحت کے شعبے میں دوطرفہ تعاون، ویکسینز اور ادویات کی مقامی تیاری، روایتی و جدید طبی ٹیکنالوجی کے فروغ اور عوامی مفاد میں اصلاحات پر تفصیلی گفتگو کی گئی۔
مصطفیٰ کمال نے کہا کہ پاکستان حکومت صحت کے شعبے میں درآمدات پر انحصار کم کرنے اور مقامی سطح پر پیداوار بڑھانے کے لیے پختہ عزم رکھتی ہے۔ دونوں وزرائے صحت نے تجربات کے تبادلے اور باہمی تعاون کو مزید فروغ دینے کے عزم کا اظہار کیا۔
مصطفیٰ کمال نے پاک-چین دوستی کو "دلوں کی دھڑکن” قرار دیتے ہوئے کہا کہ دونوں ملکوں کے عوام ایک دوسرے سے گہری وابستگی رکھتے ہیں۔ ترجمان وزارت صحت کے مطابق وزیر اعظم کی ہدایت پر جاری اصلاحات ملک میں صحت کے نظام کو جدید اور مضبوط بنانے کے لیے جاری ہیں۔
