پنجاب اسکول ایجوکیشن ڈیپارٹمنٹ نے اعلان کیا ہے کہ 28 مئی کو یومِ تکبیر کے موقع پر صوبے بھر کے اسکول کھلے رہیں گے اور اس دن مختلف سرکاری ہدایات کے تحت تقریبات اور مقابلے منعقد ہوں گے۔
منگل کو جاری کردہ نوٹیفکیشن میں تمام ڈسٹرکٹ ایجوکیشن اتھارٹیز کے چیف ایگزیکٹو آفیسرز کو ہدایت کی گئی ہے کہ سرکاری اسکولوں میں اس دن کو امن اور حوصلے کا مثبت پیغام دے کر منایا جائے۔
نوٹیفکیشن کے مطابق اسکولوں میں خصوصی صبح کی اسمبلیاں، قومی ترانہ اور دعائیں ہوں گی جبکہ پاک فوج کو خراجِ تحسین پیش کیا جائے گا۔ اس کے علاوہ ضلع کی سطح پر تقریری مقابلے، مصوری اور پوسٹر مقابلے اور ملی نغموں کی پرفارمنس کا اہتمام کیا جائے گا، جن میں ہر کیٹیگری کے فاتح کو 50,000 روپے نقد انعام دیا جائے گا۔
تمام اسکولوں کے طلبہ و اساتذہ پاکستان کی بہتری، امن اور سائنسی ترقی کے لیے عزم کریں گے۔ محکمہ تعلیم نے یہ بھی واضح کیا ہے کہ گرمیوں کی تعطیلات کا اعلان یومِ تکبیر کی تقریب کے بعد کیا جائے گا۔
یاد رہے کہ 28 مئی پاکستان میں یومِ تکبیر کے طور پر منایا جاتا ہے، جب ملک نے 1998 میں چاغی، بلوچستان کے راس کوہ پہاڑوں میں ایٹمی تجربات کر کے دنیا کا ساتواں اور اسلامی دنیا کا پہلا ایٹمی طاقت رکھنے والا ملک بننے کا اعزاز حاصل کیا۔
یہ تجربات بھارت کے 1974 کے ایٹمی تجربے کے بعد کیے گئے، جنہوں نے جنوبی ایشیا میں اسٹریٹجک توازن برقرار رکھنے اور ملک کی خودمختاری و سلامتی کو یقینی بنانے کے لیے پاکستان کی عزم کوظاہر کیا ۔
